തിരുവനന്തപുരം : കോവിഡ് വാക്സിനുകള്ക്ക് കേന്ദ്രം അനുമതി നല്കിയ സാഹചര്യത്തില് സംസ്ഥാനത്തെ ആരോഗ്യപ്രവര്ത്തകര്ക്കുള്ള പരിശീലനം ഇന്ന് ആരംഭിക്കും. ഒരു കേന്ദ്രത്തില് പ്രതിദിനം 100 പേര്ക്ക് വാക്സിന് നല്കാനാണ് കേന്ദ്രനിര്ദ്ദേശം. എല്ലാ ജില്ലയിലും 100 വീതം കേന്ദ്രങ്ങള് സജ്ജമാക്കുന്ന രീതിയിലാണ് ക്രമീകരണം. എങ്കില് തന്നെയും ആരോഗ്യപ്രവര്ത്തകരിലെ മാത്രം നടപടികള് പൂര്ത്തീകരിക്കാന് മൂന്നുമാസത്തിലേറെ വേണ്ടി വരും.
ഒരാള്ക്ക് രണ്ട് ഘട്ടമായാണ് വാക്സിന് നല്കുക. ആദ്യ വാക്സിനേഷന് ശേഷം നാല് മുതല് എട്ട് ആഴ്ച കഴിഞ്ഞാണ് രണ്ടാം ഘട്ടം നല്കുന്നത് .സംസ്ഥാനത്ത് ആറാഴ്ച ഇടവേളക്ക് ശേഷം രണ്ടാം വാക്സിന് നല്കാനാണ് ആലോചന. വാക്സിന് നല്കുന്നവരുടെ വിവരം ശേഖരിക്കുന്നതിനും നിരീക്ഷിക്കുന്നതിനും കോവിഡ് വാക്സിന് ബെനിഫിഷറി മാനേജ്മെന്റ് സിസ്റ്റം (സിവിബിഎസ്) എന്ന ഓണ്ലൈന് സംവിധാനം കേന്ദ്രം സജ്ജമാക്കിയിട്ടുണ്ട്. നിലവിലെ ഇലക്ട്രോണിക് വാക്സിന് ഇന്റലിജന്സ് നെറ്റ് വര്ക്ക് വിപുലമാക്കിയതാണ് പുതിയ സംവിധാനം.