തിരുവനന്തപുരം: കോവിഡ് 19 വ്യാപനം തടയാന് സംസ്ഥാന സര്ക്കാര് നടത്തുന്ന നടപടികള് തടയുന്നവര്ക്കെതിരെ ഒരു മാസം വരെ തടവുശിക്ഷ ലഭിക്കുന്ന കുറ്റം ചുമത്തുമെന്ന് സര്ക്കാര് വിജ്ഞാപനം. കോവിഡ് 19നെ പകര്ച്ചവ്യാധി പട്ടികയില്പ്പെടുത്തി സര്ക്കാര് പുറത്തിറക്കിയ വിജ്ഞാപനത്തിലാണ് ഇക്കാര്യം വ്യക്തമാക്കുന്നത് .
കൂടുതല് ശക്തമായ നിയന്ത്രണങ്ങള്ക്കായി അടിയന്തര സാഹചര്യങ്ങളില് ആരോഗ്യ വകുപ്പ് ഉദ്യോഗസ്ഥര്ക്ക് എത്ര കടുത്ത നടപടികളും സ്വീകരിക്കാമെന്നും വിജ്ഞാപനത്തില് പരാമര്ശിക്കുന്നു . രോഗികളെ കസ്റ്റഡിയിലെടുക്കാനും രോഗം റിപ്പോര്ട്ട് ചെയ്ത സ്ഥാപനങ്ങളുടെ പ്രവര്ത്തനം നിര്ത്തിവയ്ക്കാനും സാധിക്കും. രോഗാണുസാന്നിധ്യമുള്ള താല്ക്കാലിക കെട്ടിടങ്ങള് പൊളിക്കാമെന്നും വിജ്ഞാപനത്തില് പറയുന്നുണ്ട് .
50 പേരിലേറെ ആളുകള് കൂട്ടംകൂടി നില്ക്കരുത്. രോഗബാധിതര് പൊതുജനങ്ങളുമായി ഇടപഴകുന്നതും പൊതുസ്ഥലങ്ങളില് എത്തുന്നതും ഒഴിവാക്കണം . രോഗ ബാധിത പ്രദേശങ്ങളില് നിന്ന് എത്തുന്നവരുടെയും അവരുമായി ഇടപഴകുന്നവരുടെയും പട്ടിക തയാറാക്കാന് തദ്ദേശ സ്ഥാപനങ്ങള്ക്ക് നിര്ദേശം നല്കിയിട്ടുണ്ട്.