ദില്ലി: കോവിന് ഡാറ്റാ ചോര്ച്ചാ വിവാദത്തില് പ്രതികരണവുമായി കേന്ദ്ര സര്ക്കാര് വൃത്തങ്ങള്. ഒരു വ്യക്തിയുടെ ജനനത്തീയതിയോ വിലാസമോ കോവിന് ശേഖരിക്കുന്നില്ല. സംഭവത്തില് കേന്ദ്ര ആരോഗ്യമന്ത്രാലയം വിശദമായ റിപ്പോര്ട്ട് തയ്യാറാക്കിവരികയാണ്. ഇതുമായി ബന്ധപ്പെട്ട വിവരങ്ങള് ഇപ്പോള് പരിശോധിക്കുന്ന ഘട്ടത്തിലാണ്. വാക്സിനേഷന് സമയത്ത് നല്കിയ പേര്, ആധാര്, പാസ്പോര്ട്ട്, പാന്കാര്ഡ് തുടങ്ങിയ രേഖകള്, ജനന വര്ഷം, വാക്സീനെടുത്ത കേന്ദ്രം തുടങ്ങിയ വിവരങ്ങളാണ് ഹാക്ക് ഫോര് ലേണെന്ന ടെലഗ്രാം ബോട്ടിലൂടെ ചോര്ന്നത്.
ആദ്യ ഡോസും 2ാം ഡോസും അടിസ്ഥാനമാക്കി മാത്രമേ വാക്സിനേഷന് തീയതി ശേഖരിക്കൂവെന്നും സര്ക്കാര് വൃത്തങ്ങള് വിശദീകരിച്ചു. കോവിന് പോര്ട്ടലില് വലിയ സ്വകാര്യത ലംഘനം നടന്നതായി പ്രതിപക്ഷ നേതാക്കളാണ് ആരോപണം ഉയര്ത്തിയത്. അതേസമയം വാക്സിനേഷന് സമയത്ത് നല്കിയ വ്യക്തി വിവരങ്ങള് ടെലഗ്രാമിലൂടെ ചോര്ന്നത് ദേശ സുരക്ഷയെ പോലും ബാധിക്കുന്ന വിഷയമാണെന്ന് പ്രതിപക്ഷം ആശങ്കപ്പെട്ടു.
