തൃശൂര്: യു.ഡി.എഫ് മതതീവ്രവാദികളുടെ കയ്യില് പെട്ടുപോയെന്ന സി.പി.എം സംസ്ഥാന സെക്രട്ടറി കോടിയരി ബാലകൃഷ്ണന്റെ പ്രസ്താവനക്കെതിരെ സി.എം.പി നേതാവ് സി.പി ജോണ്. പ്രസ്താവന അതിശയിപ്പിച്ചുവെന്നും തലച്ചോറില് കാക്കിനിക്കറിട്ടയാളാണ് കോടിയേരിയെന്നും സി.പി ജോണ് ഫേസ്ബുക്കിലൂടെ പ്രതികരിച്ചു.
”മതതീവ്രവാദികളുമായി സഖ്യത്തിലെന്ന് പറയുന്ന സി.പി.എം തമിഴ്നാട്ടില് മുസ്ലീം ലീഗുള്പ്പെട്ട മുന്നണിയിലാണ്. സി.പി.എമ്മും സി.പി.ഐയും ജയിച്ചതില് ലീഗിന്റെ വോട്ടുണ്ട്. മുസ്ലിംലീഗിന്റെയും കോണ്ഗ്രസിന്റെയും സഹായമില്ലാതെ കമ്മ്യൂണിസ്റ്റ് പാര്ട്ടികള്ക്കുള്ളത് ആലപ്പുഴയിലെ ഒരുസീറ്റ് മാത്രമാണ്.”
”സി.പി.എം ജമാഅത്തെ ഇസ്ലാമിയുമായി മുമ്പ് സംസാരിച്ചിട്ടുണ്ട്. ജമാഅത്തെ ഇസ്ലാമിയുമായി രാഷ്ട്രീയ സഖ്യമില്ല. ഫാസിസത്തിനെതിരെ പ്രതികരിക്കുന്നവരുമായി പ്രാദേശിക തലത്തില് സംസാരിക്കുമെന്ന് യു.ഡി.എഫ് തീരുമാനം. അതില് യാതൊരു മറയുമില്ല.”
”എം.എം ഹസനും മുസ്ലീം ലീഗും ജമാഅത്തെ ഇസ്ലാമിയും ചേരുമ്പോള് മുസ്ലീം തീവ്രവാദമെന്ന് പറയുന്നു. കാക്കിട്രൗസറല്ല, തലച്ചോറില് കാക്കിനിക്കറിട്ടയാളാണ് കോടിയേരി. ലീഗടക്കമുള്ള പാര്ട്ടികളെ വിമര്ശിക്കുമ്പോള് സുരേന്ദ്രനും ശശികല ടീച്ചറും പറയാത്ത വര്ഗീയത കോടിയേരി പറഞ്ഞത് ഇടതുപക്ഷത്തിന് അപമാനമാണ്”
”ഞങ്ങള് സി.ബി.ഐയെ വിളിച്ചെന്ന് പറയുന്നവര് അലനും താഹക്കും വേണ്ടി എന്.ഐ.ഐയാണ് നിങ്ങള് വിളിച്ചത്. എത്രയോ പേരെ ഏറ്റുമുട്ടലിലൂടെ കൊന്നു. നിങ്ങളുടെ ഡി.ജി.പി അമിത് ഷായിലേക്കുള്ള പാലമായി വര്ത്തിക്കുന്നു” -സി.പി ജോണ് കൂട്ടിച്ചേര്ത്തു.
