തിരുവനന്തപുരം : ജീവിച്ചിരിക്കെ സ്വന്തം പേരില്‍ ഫൗണ്ടേഷന്‍ ഉണ്ടാക്കി പരിപാടി സംഘടിപ്പിച്ച കേന്ദ്ര കണ്‍ട്രോള്‍ കമ്മീഷന്‍ ചെയര്‍മാന്‍ പന്ന്യന്‍ രവീന്ദ്രന്റെ ചെവിക്ക് പിടിച്ച്‌ സി.പി.ഐ സംസ്ഥാന നിര്‍വാഹക സമിതി. പന്ന്യന്‍ രവീന്ദ്രന്‍ (പി.ആര്‍) ഫൗണ്ടേഷന്‍ എന്ന പേരില്‍ രൂപവത്കരിച്ച സംഘടനയുടെ പേരില്‍ കഴിഞ്ഞ ദിവസം പന്ന്യന്റെ സാന്നിധ്യത്തില്‍ ചില പരിപാടികള്‍ സംഘടിപ്പിച്ചിരുന്നു.
ഇത് പാര്‍ട്ടി സമ്മേളനങ്ങളില്‍ ചര്‍ച്ചയായപ്പോഴാണ് സംസ്ഥാന നേതൃത്വം ശ്രദ്ധിച്ചത്. ബുധനാഴ്ച ചേര്‍ന്ന നിര്‍വാഹക സമിതിയില്‍ അംഗങ്ങള്‍ കൂട്ടത്തോടെ പന്ന്യന്റെ നടപടിയെ വിമര്‍ശിച്ചു. കാര്യം സമ്മതിച്ച പന്ന്യന്‍, അതൊരു വാട്സ്ആപ് കൂട്ടായ്മ മാത്രമാണെന്ന് വാദിച്ചു. ത‍ന്റെ പേരില്‍ രജിസ്റ്റര്‍ ചെയ്തിട്ടില്ലെന്നും പറഞ്ഞു. വിശദീകരണം തള്ളിയ നേതൃത്വം ഇത്തരം നടപടി ആവര്‍ത്തിക്കരുതെന്ന് നിര്‍ദേശിച്ചു.
