കൊച്ചി: തമിഴ്നാട്ടില്നിന്നുള്ള കവര്ച്ച സംഘം സംസ്ഥാനത്ത് എത്തിയതായി പോലീസ് സ്റ്റേഷനുകള്ക്ക് ജില്ല പോലീസ് മേധാവിയുടെ ജാഗ്രത നിര്ദേശം.ജനത്തിരക്കുള്ള സ്ഥലങ്ങളിലും ബസുകളില് കയറിയും സ്വര്ണാഭരണങ്ങള് അപഹരിക്കുന്ന സ്ത്രീകള് അടങ്ങുന്ന സംഘം എത്തിയതായും ആളുകളുടെയും പോലീസിന്റെയും അതിജാഗ്രത ഉണ്ടാകണമെന്നുമാണ് വടകര റൂറല് ജില്ല പോലീസ് മേധാവിയുടെ മുന്നറിയിപ്പ്.
തമിഴ്നാട് കന്യാകുമാരി ജില്ലയിലുള്ള പിടിച്ചുപറി സംഘമാണ് കേരളത്തിലെത്തിയത്. നിരവധി കേസുകളില് ഉള്പ്പെട്ട സത്രീകള് ഉള്പ്പെടെയുള്ള സംഘം കെ.എ 45 എം 2833 നമ്ബര് ടവേര വാഹനത്തിലാണ് ഇവിടെ എത്തിയത്. മൈസൂരു വഴിയാണ് സംഘം സംസ്ഥാനത്തേക്ക് കടന്നതെന്നാണ് പോലീസിന് ലഭിച്ച വിവരം.സംസ്ഥാനത്ത് ഇത്തരത്തിലുള്ള കുറ്റകൃത്യങ്ങള് കണ്ടെത്താന് ഡിവൈ.എസ്.പി, സി.ഐ എന്നിവരുടെ കീഴില് നേരത്തെ പ്രത്യേക സ്ക്വാഡുകള് രൂപവത്കരിച്ചിരുന്നു.മോഷണം ഉള്പ്പെടെ നിരവധി ക്രിമിനല് കേസുകള് ഇവര് തെളിയിച്ചിരുന്നു. എന്നാല്, സ്ക്വാഡുകള് പിരിച്ചുവിട്ടത് തിരിച്ചടിയായിരിക്കുകയാണ്.ജാഗ്രത നിര്ദേശത്തിന്റ അടിസ്ഥാനത്തില് സ്റ്റേഷന് ഓഫിസര്മാരുടെ നേതൃത്വത്തില് നിരീക്ഷണം ശക്തമാക്കിയിട്ടുണ്ട്.