കോന്നി : എലിമുള്ളുംപ്ലാക്കൽ വന സംരക്ഷണ സമിതിയിലെ ക്രമക്കേടുകൾ അടിയന്തിരമായി പരിഹരിക്കണമെന്ന് സി പി ഐ എലിമുള്ളുംപ്ലാക്കൽ ബ്രാഞ്ച് കമ്മറ്റി ആവശ്യപ്പെട്ടു. എലിമുള്ളുംപ്ലാക്കൽ വന സംരക്ഷണ സമിതി അംഗങ്ങളുടെ കരട് ലിസ്റ്റ് പ്രസിദ്ധീകരിച്ചതിൽ നിറയെ അപാകതയാണ്. നിലവിൽ ഉണ്ടായിരുന്ന അംഗങ്ങളെ ഒഴിവാക്കിയും അഞ്ച് വർഷം മുൻപ് ഭവന സന്ദർശനം നടത്തി ഫീസ് ഈടാക്കി ചേര്‍ത്ത അംഗങ്ങളെ ഒഴിവാക്കിയുമാണ് ഇപ്പോള്‍ ലിസ്റ്റ് പ്രസിദ്ധീകരിച്ചിരിക്കുന്നത്.
അധികാരികളുടെ ഇഷ്ടക്കാരെ മാനദണ്ഡമോ കാലയളവോ കൂടാതെ ലിസ്റ്റിൽ ഉൾപ്പെടുത്തുന്നതിന് ശ്രമിച്ചിട്ടുമുണ്ട്. മുൻപ് മാനദണ്ഡങ്ങൾ പാലിക്കാതെയുള്ള തെരഞ്ഞെടുപ്പ് നടത്താൻ തീരുമാനിച്ചുവെങ്കിലും ചട്ട ലംഘനം കാരണം സമിതി അംഗങ്ങൾ തെരഞ്ഞെടുപ്പ് ബഹിഷ്കരിച്ചിരുന്നു. വരാൻ പോകുന്ന വന സംരക്ഷണ സമിതി തെരഞ്ഞെടുപ്പിന് മുൻപായി അപാകതകൾ പരിഹരിച്ച് മുൻ കാലയളവു മുതൽ ഉള്ള അംഗങ്ങളെ ലിസ്റ്റിൽ ഉൾപ്പെടുത്തി മാനദണ്ഡങ്ങൾക്ക്‌ വിധേയമായി തെരഞ്ഞെടുപ്പ് നടത്തണമെന്നുമാണ് ഇപ്പോള്‍ ആവശ്യം ഉയരുന്നത്. സമിതി പ്രവർത്തനങ്ങളിൽ അധികാരികൾ കൂടുതല്‍ ഉത്തരവാദിത്തപരമായി ഇടപെടണമെന്നും സി പി ഐ എലിമുള്ളുംപ്ലാക്കൽ ബ്രാഞ്ച് കമ്മറ്റി ആവശ്യപ്പെട്ടു.
