പെരുമ്പാവൂര്: പകല് ആക്രി പെറുക്കാനെന്ന വ്യാജേനെ കറങ്ങിനടന്ന ശേഷം രാത്രി മോഷണം നടത്തുന്ന അഞ്ചംഗ അന്യസംസ്ഥാന തൊഴിലാളികള് പെരുമ്പാവൂരില് അറസ്റ്റിൽ. ആസം നൗഗാവ് ജില്ലയില് സദ്ദാം ഹുസൈന് ഭൂയ്യ (24), ആഷികുര് റഹ്മാന് (27), വെസ്റ്റ് ബംഗാള് മൂര്ഷിദാബഗദ് സ്വദേശി മിസാനൂര് മുല്ല (24), ഇബ്രാഹിം ഷെയ്ഖ് (32), ജൈനുല് ഷെയ്ഖ് (32) എന്നിവരെയാണ് കുന്നത്തുനാട് പോലീസ് അറസ്റ്റ് ചെയ്തത്.
മോഷണം തടയുന്നതിന് ജില്ലാ പോലീസ് മേധാവി കെ. കാര്ത്തിക്കിന്റെ നിര്ദ്ദേശത്തെ തുടര്ന്ന് രൂപീകരിച്ച പ്രത്യേക പോലീസ് സംഘം രാത്രികാല പട്രോളിങ് നടത്തുന്നതിനിടയിലാണ് മോഷണ സംഘം പിടിയിലായത്. ചേലക്കുളത്ത് വണ്ടി പൊളിച്ചു വില്ക്കുന്ന വര്ക്ക് ഷോപ്പില് നിന്നും അറുപതിനായിരം രൂപ വിലവരുന്ന ചെമ്പും, മറ്റു സാധനങ്ങളും രാത്രിയില് മോഷണം നടത്തിയ കേസിലാണ് ഇവര് പിടിയിലായത്.