കൊച്ചി: ആഡംബര കാര് വിവാദത്തില് സിഐടിയു നേതാവ് പി കെ അനില്കുമാറിനെതിരെ പാര്ട്ടി നടപടിക്ക് നീക്കം. അനില്കുമാറിനെ ചുമതലകളില് നിന്ന് നീക്കുമെന്നാണ് വിവരം. ഇക്കാര്യത്തില് ഇന്ന് ചേര്ന്ന സിപിഎം എറണാകുളം ജില്ലാ കമ്മിറ്റിയാണ് തീരുമാനമെടുത്തത്. അനില്കുമാറിന് സിഐടിയു ഭാരവാഹിത്വമാണ് ഉള്ളത്. ഈ സ്ഥാനങ്ങളില് നിന്നെല്ലാം ഇദ്ദേഹത്തെ നീക്കാന് സിഐടിയുവിന് സിപിഎം ജില്ലാ കമ്മിറ്റി നിര്ദ്ദേശം നല്കും. ആഡംബര വാഹനം വാങ്ങിയതും ഇത് ന്യായീകരിച്ചതും പാര്ട്ടിക്ക് അവമതിപ്പുണ്ടാക്കിയതായി സിപിഎം ജില്ലാ കമ്മിറ്റി വിലയിരുത്തി.
ഭാര്യയുടെ പേരില് വാങ്ങിയ 52 ലക്ഷം രൂപ വിലമതിക്കുന്ന മിനി കൂപ്പര് കാറുമായി ബന്ധപ്പെട്ടാണ് അനില്കുമാര് വിവാദത്തിലായത്. സിഐടിയുവിന് കീഴിലുള്ള കേരള പെട്രോളിയം ആന്റ് ഗ്യാസ് വര്ക്കേഴ്സ് യൂണിയന് സംസ്ഥാന സെക്രട്ടറിയാണ് പി കെ അനില്കുമാര്. തൊഴിലാളി പ്രസ്ഥാനത്തിന്റെ നേതാവിന് സഞ്ചരിക്കാന് മിനികൂപ്പര് എന്ന വിശേഷണവുമായാണ് അനില്കുമാര് മിനികൂപ്പര് വാങ്ങിയ ചിത്രം സോഷ്യല് മീഡിയയില് പലരും പങ്കുവെച്ചത്. തുടര്ന്ന് അനില്കുമാറിനെതിരെ പലകോണുകളില് നിന്നും വിമര്ശനവും ഉയര്ന്നിരുന്നു.
