തിരൂർ: തിരൂരില് മന്ത്രി വി.അബ്ദുറഹിമാന് തോല്ക്കുമെന്ന് സിപിഎം വിലയിരുത്തല്. തിരൂരില് ശക്തമായ പോരാട്ടം നടന്നെങ്കിലും വിജയം ഉറപ്പില്ല. തവനൂരും പൊന്നാനിയും സീറ്റ് നിലനിര്ത്തുമെന്നും താനൂരില് തോല്ക്കുമെന്നും ജില്ലാ കമ്മിറ്റി വിലയിരുത്തി. ശക്തരായ സ്ഥാനാര്ഥികളെ കളത്തിലിറക്കിയെങ്കിലും മലപ്പുറത്ത് രണ്ട് സീറ്റിലേക്ക് മാത്രമായി ഒതുങ്ങിയേക്കുമെന്നാണ് സിപിഎം ജില്ലാ കമ്മിറ്റിയുടെ വിലയിരുത്തല്. തവനൂരില് 3,000 മുതല് 5,000 വരെ ഭൂരിപക്ഷം നേടിയേക്കുമെന്നാണ് കണക്കുകൂട്ടലുകള്. പൊന്നാനിയില് 7,000 വോട്ടിന്റെ ഭൂരിപക്ഷം നേടിയേക്കും.
പെരിന്തല്മണ്ണയില് യുഡിഎഫ് മികച്ച വിജയം നേടുമെന്നും ജില്ലാ കമ്മിറ്റി കണക്കുകൂട്ടി. അതേസമയം ആലപ്പുഴ ജില്ലയിലും തെരഞ്ഞെടുപ്പ് പ്രകടനങ്ങള് സിപിഎം ജില്ലാ നേതൃത്വം വിലയിരുത്തി. അമ്പലപ്പുഴയില് 1,800 വോട്ടുകള്ക്ക് തോല്ക്കാന് സാധ്യതയുണ്ടെന്ന കണക്കും 3,800 വോട്ടുകള്ക്ക് ജയിക്കാമെന്ന മറ്റൊരു കണക്കുമാണ് നിലവില് ജില്ലാ നേതൃത്വത്തിന് ലഭിച്ചത്. ഹരിപ്പാടും കുട്ടനാടും തോല്ക്കുമെന്നും നാലിടത്ത് കടുത്ത മത്സരം നേരിട്ടതായും സിപിഎം വിലയിരുത്തി. ചേര്ത്തല, മാവേലിക്കര, ചെങ്ങന്നൂര്, കായംകുളം സീറ്റുകള് ആലപ്പുഴയിലും അരൂരിലും കടുത്ത മത്സരമാണ് നടന്നത്.
