കോഴിക്കോട് : കൊറോണയുടെ പശ്ചാത്തലത്തില് നടത്തുന്ന സൗജന്യ റേഷന് വിതരണം സിപിഎം പാര്ട്ടി പരിപാടിയാക്കി മാറ്റുന്നുവെന്ന് കോണ്ഗ്രസിന്റെ ആരോപണം. മറ്റുപാര്ട്ടിക്കാര്ക്ക് ഗോളടിക്കാന് അവസരം നല്കരുതെന്ന് പറയുന്ന സിപിഎം പേരാമ്പ്ര ലോക്കല് സെക്രട്ടറിയുടേതെന്ന ഫോണ് സന്ദേശം കോണ്ഗ്രസ് നേതാവ് ടി.സിദ്ദീഖ് പുറത്തുവിട്ടു. സിപിഎം ബ്രാഞ്ച് കമ്മിറ്റികളുടെ നേതൃത്വത്തില് റേഷന് കാര്ഡുകള് സ്വരൂപിച്ച് റേഷന് കടകളില് നിന്ന് സാധനങ്ങള് ഒന്നിച്ചു വാങ്ങി വീടുകളില് വിതരണം ചെയ്യുന്നു. ഇതൊരു പാര്ട്ടി പരിപാടിയായിട്ടാണ് സിപിഎം ഏറ്റെടുത്തിരിക്കുന്നത്. വ്യാപകമായി രാഷ്ട്രീയ മുതലെടുപ്പിന് വേണ്ടി അട്ടിമറി നടത്തിയിരിക്കുകയാണെന്നും ടി.സിദ്ദീഖ് ആരോപിച്ചു.
ഇതുസംബന്ധിച്ച സിപിഎം പേരാമ്പ്ര വെസ്റ്റ് ലോക്കല് സെക്രട്ടറി പ്രമോദിന്റെ ശബ്ദസന്ദേശം സിദ്ദീഖ് ഫെയ്സ്ബുക്കിലൂടെ പുറത്തുവിട്ടു. ഇത് അട്ടിമറിക്കുള്ള തെളിവാണെന്നും അദ്ദേഹം പറഞ്ഞു. റേഷന് വിതരണത്തിന് നിലവില് എല്ലാപാര്ട്ടിക്കാരേയും ഉള്പ്പെടുത്തി ഒരു വോളണ്ടിയര് സംവിധാനം ഉണ്ട്. അതിനെ മാത്രം ഏല്പ്പിച്ച് കഴിഞ്ഞാല് ചില പാര്ട്ടിക്കാര് വന്നു ഗോളടിക്കുമെന്നും അതുണ്ടാകാന് പാടില്ലെന്നും പാര്ട്ടിക്ക് നേട്ടമുണ്ടാക്കണമെന്നും സിദ്ദീഖ് പുറത്തുവിട്ട ശബ്ദ സന്ദേശത്തില് പറയുന്നുണ്ട്.
ഇവര്ക്കെതിരെ നടപടിയെടുക്കണമെന്നും റേഷന് വിതരണത്തില് എല്ലാ സന്നദ്ധപ്രവര്ത്തകരേയും പങ്കാളിയാക്കണമെന്നും ആവശ്യപ്പെട്ട് ടി. സിദ്ദീഖ് മുഖ്യമന്ത്രിക്കും ജില്ലാ സപ്ലൈ ഓഫീസര്ക്കും പരാതി നല്കി. അതേ സമയം തന്നെ റേഷന് വിതരണത്തെചൊല്ലി മറ്റു രാഷ്ട്രീയ പാര്ട്ടികള്ക്കെതിരെയും ആരോപണം ഉയര്ന്നിട്ടുണ്ട്. വോളണ്ടിയര്മാരായി എത്തുന്നവര് പാര്ട്ടി അടയാളങ്ങളുള്ള ഡ്രസും മറ്റുംധരിച്ചാണ് എത്തുന്നതെന്നാണ് ആരോപണം.
