തിരുവനന്തപുരം : സിപിഐക്ക് പ്രതിപക്ഷ ഉപനേതാവ് പദവി വേണമെന്ന ബിനോയ് വിശ്വത്തിന്റെ ആവശ്യത്തിൽ സിപിഎം കടുത്ത അതൃപ്തിയിൽ. തിരഞ്ഞെടുപ്പ് തോൽവിക്ക് പിന്നാലെ പദവികൾക്കായി പരസ്യമായി അവകാശവാദം ഉന്നയിച്ചത് ശരിയായില്ലെന്നാണ് സിപിഎം നേതൃത്വത്തിന്റെ വിലയിരുത്തൽ. പ്രതിപക്ഷ ഉപനേതാവ് പദവി സിപിഐക്ക് വേണമെന്ന ആവശ്യം സംസ്ഥാന സെക്രട്ടറി ബിനോയ് വിശ്വം പരസ്യമായി ഉന്നയിച്ചതാണ് സിപിഎമ്മിനെ ചൊടിപ്പിച്ചത്. ഈ പദവി എന്നത് ഭരണഘടനാപരമായ ഒന്നല്ലെന്നും ഉപമുഖ്യമന്ത്രി പദവി പോലെ കേവലം ഒരു ആലങ്കാരിക പദവി മാത്രമാണെന്നും സിപിഎം ചൂണ്ടിക്കാട്ടുന്നു.
തിരഞ്ഞെടുപ്പ് തോൽവിക്ക് പിന്നാലെ സിപിഐ നേതാക്കൾ നടത്തുന്ന പ്രതികരണങ്ങളിൽ മുന്നണിയിലെ മറ്റ് ഘടകകക്ഷികൾക്കും വിയോജിപ്പുണ്ട്. തോൽവി ഉണ്ടാകുമ്പോൾ അത് എല്ലാവരും ചേർന്ന് കൂട്ടുത്തരവാദിത്വത്തോടെ നേരിടുന്നതിന് പകരം, പഴിചാരുന്ന രീതിയാണ് സിപിഐ സ്വീകരിക്കുന്നതെന്ന വിമർശനം ശക്തമാണ്. സിപിഐയുടെ മുഖപത്രമായ ‘ജനയുഗത്തിൽ’ തോൽവിക്ക് കാരണം ഭരണവിരുദ്ധ വികാരമാണെന്ന് എഡിറ്റോറിയൽ വന്നതും സിപിഎമ്മിന്റെ അതൃപ്തി വർദ്ധിപ്പിച്ചു. സിപിഐയുടെ ഈ നിലപാടുകളിലുള്ള അതൃപ്തി സിപിഎം നേതൃത്വം അവരെ നേരിട്ട് അറിയിക്കാനാണ് സാധ്യത.
