കോഴിക്കോട്: കോഴിക്കോട് മെഡിക്കല് കോളജിന് സമീപം തൂങ്ങി മരിച്ച നിലയില് കണ്ടെത്തിയ ആദിവാസി യുവാവ് വിശ്വനാഥന്റെ മരണം ക്രൈം ബ്രാഞ്ച് അന്വേഷിക്കും. മരണം നടന്നു ഒന്നര മാസം പിന്നിട്ടപ്പോഴാണ് അന്വേഷണം ക്രൈംബ്രാഞ്ചിന് കൈമാറിയത്. അതിക്രമം നടത്തിയ പ്രതികളെ ഇതുവരെ കണ്ടെത്താന് സാധിച്ചിട്ടില്ല. ഭാര്യയുടെ പ്രസവത്തിന് കൂട്ടിരിപ്പുകാരനായി കോഴിക്കോട് മെഡിക്കല് കോളജില് എത്തിയപ്പോഴാണ് വയനാട് സ്വദേശിയായ വിശ്വനാഥനെ തൂങ്ങി മരിച്ച നിലയില് കണ്ടെത്തിയത്.
ഫെബ്രുവരി 11നാണ് വിശ്വനാഥനെ കോഴിക്കോട് മെഡിക്കല് കോളജ് മാതൃശിശു സംരക്ഷണ കേന്ദ്രത്തിന് സമീപം മരിച്ച നിലയില് കണ്ടെത്തിയത്. ഭാര്യയുടെ പ്രസവത്തിനായി എത്തിയ വിശ്വനാഥനെ മൊബൈല് ഫോണ് മോഷ്ടിച്ചെന്ന് ആരോപിച്ച ആള്ക്കൂട്ടം വിചാരണ നടത്തിയിരുന്നു. അതില് മനംനൊന്ത് ആത്മഹത്യ ചെയ്തത് എന്നാണ് കരുതുന്നത്.
