ആലുവ: സ്ഥിരം കുറ്റവാളിയെ കാപ്പ ചുമത്തി ജയിലിലടച്ചു. വേങ്ങൂര്‍ വെസ്റ്റ് നെടുങ്ങപ്ര കല്ലിടുമ്പില്‍ വീട്ടില്‍ അമലിനെയാണ് (26) ജയിലിലടച്ചത്.ജില്ല പോലീസ് മേധാവി വിവേക് കുമാറിന്‍റെ റിപ്പോര്‍ട്ടിന്‍റെ അടിസ്ഥാനത്തിലാണ് നടപടി.ആറ് വര്‍ഷത്തിനുള്ളില്‍ കുറുപ്പംപടി, കോതമംഗലം, അങ്കമാലി പോലീസ് സ്റ്റേഷന്‍ പരിധിയില്‍ കൊലപാതകം, കൊലപാതകശ്രമം, ദേഹോപദ്രവം, അതിക്രമിച്ച്‌ കടക്കല്‍, ന്യായവിരുദ്ധമായി സംഘം ചേരല്‍, ആയുധനിയമം തുടങ്ങി നിരവധി കേസുകള്‍ ഇയാള്‍ക്കെതിരെയുണ്ട്. അമലിനെ 2017ല്‍ കാപ്പനിയമ പ്രകാരം ആറുമാസം കരുതല്‍ തടങ്കലില്‍ അടച്ചിരുന്നു.
വീണ്ടും കുറ്റകൃത്യത്തില്‍ ഏര്‍പ്പെട്ടതിനാല്‍ 2020 ഒക്ടോബര്‍ മുതല്‍ ഒരു വര്‍ഷത്തേക്ക് കാപ്പ ചുമത്തി ജയിലില്‍ അടച്ചു. ശിക്ഷാകാലാവധി കഴിഞ്ഞ് പുറത്തിറങ്ങിയ ഇയാള്‍ കഴിഞ്ഞ മാര്‍ച്ചില്‍ കുറുപ്പംപടി നെടുങ്ങപ്രയില്‍ ലോറി ഡ്രൈവറോട് പണം ആവശ്യപ്പെടുകയും കൊടുക്കാത്തതിനാല്‍ ലോറി തട്ടിക്കൊണ്ട് പോവുകയും ചെയ്തു. ഈ കേസില്‍ പ്രതിയായതിനെ തുടര്‍ന്നാണ് വീണ്ടും കാപ്പ ചുമത്തി ജയിലില്‍ അടച്ചത്.
