ഡൽഹി: കിരീടധാരണത്തിൽ ചാൾസ് മൂന്നാമനെയും കാമില രാജ്ഞിയെയും അഭിനന്ദിച്ച് പ്രധാനമന്ത്രി നരേന്ദ്രമോദി. ‘ചാൾസ് മൂന്നാമൻ രാജാവിനും കാമില രാജ്ഞിക്കും അവരുടെ കിരീടധാരണത്തിൽ ഊഷ്മളമായ അഭിനന്ദനങ്ങൾ. വരും വർഷങ്ങളിൽ ഇന്ത്യ-യുകെ ബന്ധം കൂടുതൽ ദൃഢമാകുമെന്ന് ഞങ്ങൾക്ക് ഉറപ്പുണ്ട്’ എന്നാണ് അദ്ദേഹം ട്വീറ്റ് ചെയ്തത്.ഇന്നലെയാണ് കിരീടധാരണ ചടങ്ങുകൾ നടന്നത്. നൂറ്റാണ്ടിലെ ചരിത്ര കൗതുകത്തിന്റെ പ്രൗഢഗാംഭീര്യത്തോടെയാണ് ബ്രിട്ടനിലെ ചാൾസ് മൂന്നാമൻ രാജാവിന്റെ കിരീടധാരണ ചടങ്ങ് നടന്നത്.
വെസ്റ്റ് മിൻസ്റ്റർ ആബിയൽ കാന്റർബറി ആർച്ച് ബിഷപ്പിന്റെ നേതൃത്വത്തിൽ അഞ്ച് ഘട്ടങ്ങളായി ആയിരുന്നു ചടങ്ങ് നടന്നത്. ചാൾസ് മൂന്നാമൻ രാജാവിനെ കാന്റർബറി ആർച്ച് ബിഷപ്പ് ജസ്റ്റിൻ വെൽബി കിരീടം അണിയിച്ചിരുന്നു. ഒപ്പം കാമില രാജ്ഞിയെയും കിരീടം അണിയിച്ചിരുന്നു. കിരീടാവകാശി വില്യം രാജകുമാരൻ ചാൾസ് രാജാവിന് മുന്നിൽ കൂറ് പ്രഖ്യാപിച്ചു. കിരീടധാരണ ചടങ്ങുകൾക്ക് ശേഷം വെസ്റ്റ്മിൻ്സറ്റർ ആബിയിൽ നിന്ന് ബക്കിങ്ഹാം കൊട്ടാരത്തിൽ തിരികെ എത്തിയ ചാൾസ് രാജാവും കാമില രാജ്ഞിയും ബാൽക്കണിയിൽ നിന്ന് ജനങ്ങളെ അഭിവാദ്യം ചെയ്തതോടെയാണ് ചടങ്ങുകൾ അവസാനിച്ചത്.
