കൊച്ചി : സിഎസ്ഐ സഭ മുന് ബിഷപ്പ് ധര്മ്മരാജ് റസാലത്തിന് ഹൈക്കോടതിയില് നിന്ന് തിരിച്ചടി. കാരക്കോണം സിഎസ്ഐ മെഡിക്കല് കോളജിലെ തലവരിപ്പണ കേസ്സിലെ ഇ ഡി അന്വേഷണം റദ്ദാക്കണമെന്ന ഹർജി ഹൈക്കോടതി തള്ളി. അന്വേഷണം തുടരാമെന്ന് കോടതി വ്യക്തമാക്കി. തിരുവനന്തപുരം കാരക്കോണം സിഎസ്ഐ മെഡിക്കല് കോളജില് എംബിബിഎസ് സീറ്റിനായി തലവരിപ്പണം വാങ്ങി തട്ടിപ്പ് നടത്തിയ കേസിൽ എൻഫോഴ്സ് ഡയറക്ടററേറ്റിന്റെ നടപടി ചോദ്യം ചെയ്യുന്ന ഹർജിയിലാണ് ഹൈക്കോടതി ഇന്ന് വിധി പറഞ്ഞത്.
കേസ് റദ്ദാക്കണമെന്നും ഇഡി അന്വേഷണം തടയണമെന്നും ആവശ്യപ്പെട്ട് ബിഷപ്പ് ധർമ്മരാജ് റസാലം സമർപ്പിച്ച ഹർജി ജ. വി ജി അരുൺ അധ്യക്ഷനായ സിംഗിൾ ബഞ്ച് തള്ളി. ഇഡി അന്വേഷണം തുടരാമെന്ന് കോടതി വ്യക്തമാക്കി. കേസിന്റെ ഭാഗമായി കണ്ടുകെട്ടിയ പണം ക്ലെയിം പെറ്റിഷൻ നൽകിയവർക്ക് ഇഡി വിതരണം ചെയ്യുന്ന നടപടിയടക്കം ചോദ്യം ചെയ്തായിരുന്നു ഹർജി. 28 രക്ഷിതാക്കളില് നിന്നായി ഏഴ് കോടി രൂപയിലധികം കോഴ വാങ്ങിയെന്നായിരുന്നു കേസ്.
