കോട്ടയം: കോട്ടയം കടുത്തുരുത്തിയില് സൈബര് അധിക്ഷേപത്തെ തുടര്ന്ന് യുവതി ആത്മഹത്യ ചെയ്ത സംഭവത്തില് പ്രതിയായ യുവാവിനെ കണ്ടെത്താന് ലുക്ക് ഔട്ട് നോട്ടീസിറക്കി പോലീസ്. നാല്പതംഗ പോലീസ് സംഘം നാല് ദിവസമായി അന്വേഷണം നടത്തിയിട്ടും പ്രതിയായ അരുണ് വിദ്യാധരനെ കണ്ടെത്താന് കഴിഞ്ഞിട്ടില്ല. ഈ സാഹചര്യത്തിലാണ് ലുക്ക് ഔട്ട് നോട്ടീസിറക്കിയത്. തമിഴ്നാട് കേന്ദ്രീകരിച്ചാണ് ഇപ്പോഴും അന്വേഷണം നടക്കുന്നത്. അരുണിന്റെ സൈബര് അധിക്ഷേപത്തെ തുടര്ന്ന് കോതനല്ലൂര് സ്വദേശിനി ആതിര തിങ്കളാഴ്ചയാണ് ആത്മഹത്യ ചെയ്തത്.
തിങ്കളാഴ്ച ആതിരയുടെ ആത്മഹത്യയ്ക്ക് പിന്നാലെ അരുണിന്റെ ഫോണ് സ്വിച്ച് ഓഫ് ചെയ്ത നിലയിലായതോടെയാണ് പോലീസ് അന്വേഷണം പ്രതിസന്ധിയിലായത്. അതേസമയം ആതിരക്ക് നീതിയാവശ്യപ്പെട്ട് യൂത്ത് കോണ്ഗ്രസ് പ്രവര്ത്തകര് കോട്ടയം കടുത്തുരുത്തി പോലീസ് സ്റ്റേഷനിലേക്ക് നടത്തിയ മാര്ച്ചില് സംഘര്ഷമുണ്ടായി. സൈബര് അധിക്ഷേപത്തെ തുടര്ന്ന് പെണ്കുട്ടി ആത്മഹത്യ ചെയ്ത സംഭവത്തില് പ്രതിയുടെ അറസ്റ്റാവശ്യപ്പെട്ടായിരുന്നു പ്രതിഷേധം. മുതിര്ന്ന കോണ്ഗ്രസ് നേതാവ് തിരുവഞ്ചൂര് രാധാകൃഷ്ണന് പോലീസ് സ്റ്റേഷനിലെത്തി പോലീസ് ഉദ്യോഗസ്ഥരുമായി ചര്ച്ച നടത്തി. പോലീസിന്റെ ഭാഗത്ത് നിന്നും ഗുരുതര വീഴ്ചയുണ്ടായതായി തിരുവഞ്ചൂര് ആരോപിച്ചു.