ആലപ്പുഴ : ജി സുധാകരന്റെ ചില നിലപാടുകളോട് യോജിക്കാൻ കഴിയില്ലെന്ന് കെ.പി.സി.സി വൈസ് പ്രസിഡന്റ് ഡി സുഗതൻ. സ്വതന്ത്ര സ്ഥാനാർഥിത്വം പ്രഖ്യാപിച്ചതിന് ശേഷവും പിണറായി വിജയന്റെ നേതൃത്വത്തിൽ വീണ്ടും എൽ.ഡി.എഫ് അധികാരത്തിൽ വരാൻ താത്പര്യപ്പെടുന്നുവെന്നാണ് സുധാകരൻ പറയുന്നത്. അങ്ങനെയൊരാളെ കോൺഗ്രസിനൊപ്പം നിർത്താൻ കഴിയില്ല. സുധാകരന്റേത് രണ്ട് വള്ളത്തിൽ കാൽ വയ്ക്കുന്ന നിലപാടാണെന്നും ഡി സുഗതൻ പറഞ്ഞു. അമ്പലപ്പുഴയിൽ സ്വതന്ത്രനായി മത്സരിക്കും എന്നാണ് അദ്ദേഹത്തിന്റെ ഇപ്പോഴത്തെ നിലപാട്. എല്ലാ പാർടികളുമായും തനിക്ക് നല്ല ബന്ധമാണെന്നാണ് സുധാകരൻ പറയുന്നു.
ചിലപ്പോൾ നാളെ ബി.ജെ.പിയുമായും ബന്ധപ്പെടുമായിരിക്കും. കോൺഗ്രസിൽ ചേരാൻ താത്പര്യപ്പെട്ട് സമീപിച്ചാൽ കേന്ദ്ര നേതൃത്വം അതിൽ തീരുമാനമെടുക്കുമെന്നും ഡി സുഗതൻ പറഞ്ഞു. പാർടി വിട്ട ജി സുധാകരനെ ഒപ്പം നിർത്താൻ കോൺഗ്രസിലെ ഒരു വിഭാഗം ശ്രമിക്കുമ്പോഴും ചിലയിടങ്ങളിൽ കടുത്ത അതൃപ്തിയുള്ളതായാണ് റിപ്പോർട്ട്.
