അഞ്ചല്: ഏരൂരില് പതിനാലുകാരനായ വിദ്യാര്ത്ഥിയെ വാഴത്തോട്ടത്തില് തൂങ്ങിമരിച്ച നിലയില് കണ്ടെത്തിയ സംഭവം ആത്മഹത്യയെന്ന് അന്വേഷണ റിപ്പോര്ട്ട്. കേസ് ക്രൈംബ്രാഞ്ച് അന്വേഷിക്കണമെന്ന് മാതാപിതാക്കള് ആവശ്യപ്പെട്ടു. പുനലൂര് ഡിവൈ.എസ്.പി അനില് ദാസ് പുനരന്വേഷണം നടത്തി കഴിഞ്ഞ ദിവസം ഹൈക്കോടതിയില് സമര്പ്പിച്ച റിപ്പോര്ട്ടിലാണ് വിവരം.
ഏരൂര് ഗവ.ഹയര് സെക്കന്ഡറി സ്കൂളിലെ പത്താം ക്ലാസ് വിദ്യാര്ത്ഥിയായിരുന്ന ആലഞ്ചേരി വിഷ്ണു ഭവനില് ബാബു-സിന്ധു ദമ്പതികളുടെ മകന് വിജീഷിനെയാണ് കഴിഞ്ഞ ഡിസംബര് 20ന് വീട്ടില് നിന്ന് ഒന്നര കിലോമീറ്ററോളം അകലെയുള്ള വാഴത്തോട്ടത്തിലെ ഉണങ്ങിയ വാഴക്കൈകളില് തൂങ്ങിമരിച്ച നിലയില് കണ്ടെത്തിയത്.
കാലുകള് തറയില് മുട്ടിയ നിലയിലായിരുന്നു. ഏരൂര് പോലീസ് അന്വേഷണം നടത്തി ആത്മഹത്യയെന്ന് സ്ഥിരീകരിച്ചിരുന്നു. എന്നാല്, ഇതിനെതിരെ വിജീഷിന്റെ മാതാപിതാക്കളും വിവിധ ദലിത് സാമൂഹിക സംഘടനകളും വെല്ഫെയര് പാര്ട്ടിയും പുനരന്വേഷണം ആവശ്യപ്പെട്ടുകൊണ്ട് പ്രതിഷേധ സമരങ്ങള് നടത്തി.
ഇതിനെത്തുടര്ന്ന് പുനരന്വേഷണം നടത്തുന്നതിന് റൂറല് എസ്.പി ഹരിശങ്കറുടെ നിര്ദേശാനുസരണം പുനലൂര് ഡിവൈ.എസ്.പിക്ക് അന്വേഷണച്ചുമതല നല്കി. അദ്ദേഹം അന്വേഷണം നടത്തി കോടതിയില് സമര്പ്പിച്ച പ്രാഥമിക വിവര റിപ്പോര്ട്ടിലാണ് ആത്മഹത്യ സ്ഥിരീകരിച്ചിട്ടുള്ളത്.
എന്നാല്, ഈ അന്വേഷണം തൃപ്തികരമല്ലെന്നും കേസ് ക്രൈംബ്രാഞ്ച് അന്വേഷിക്കണമെന്നുമാണ് വിജീഷിന്റെ മാതാപിതാക്കള് ആവശ്യപ്പെടുന്നത്.
