ചെന്നൈ : തമിഴ്നാട്ടിലെ പ്രശസ്ത ഭരതനാട്യം നര്ത്തകന് സാക്കിര് ഹുസൈനെ ശ്രീരംഗം രംഗനാഥര് കോവിലില്നിന്ന് ഒരു സംഘമാളുകള് മതം പറഞ്ഞ് ആക്ഷേപിച്ച് പുറത്താക്കി. ദേഹോപദ്രവമേല്പിച്ചതായും ആരോപണം. സംഭവം വിവാദമായതോടെ തമിഴ്നാട് ദേവസ്വം വകുപ്പ് അന്വേഷണത്തിന് ഉത്തരവിട്ടു. വെള്ളിയാഴ്ചയാണ് സംഘ്പരിവാര് പ്രവര്ത്തകനായ രംഗരാജന് നരസിമ്മന്റെ നേതൃത്വത്തില് ഒരു സംഘം സാക്കിര് ഹുസൈനെ കഴുത്തിനു പിടിച്ച് തള്ളി മര്ദിച്ചത്. വധഭീഷണി മുഴക്കുകയും ചെയ്തു. മര്ദനമേറ്റ സാക്കിര് ഹുസൈന് ആശുപത്രിയില് ചികിത്സയിലാണ്. പോലീസില് പരാതി നല്കി. പ്രമുഖ ക്ഷേത്രങ്ങള് പതിവായി സന്ദര്ശിക്കുന്ന വ്യക്തിയാണ് ഇദ്ദേഹം. തമിഴ്നാട് സര്ക്കാറിന്റെ ‘കലൈമാമനി’ പുരസ്കാര ജേതാവാണ്. തമിഴ്നാട്ടിലെ മിക്ക ക്ഷേത്രങ്ങളിലും നൃത്തപരിപാടി അവതരിപ്പിച്ചിട്ടുണ്ട്.
ഇതാദ്യമായാണ് മതത്തിന്റെ പേരില് മര്ദനമേല്ക്കേണ്ടിവന്നതെന്നും കടുത്ത മാനസികാഘാതത്തിലാണെന്നും സാക്കിര് ഹുസൈന് പറഞ്ഞു. അഹിന്ദുക്കള്ക്ക് പ്രവേശനമില്ലെന്ന് പറഞ്ഞാണ് തന്നെ പുറത്താക്കിയത്. പ്രളയസമയത്തും കോവിഡ് കാലത്തും മുസ്ലിം സംഘടന പ്രവര്ത്തകര് ജാതിമത ഭേദമന്യേ സേവനപ്രവര്ത്തനങ്ങള് നടത്തി. തിരുവല്ലിക്കേണി ക്ഷേത്രത്തിലും മുസ്ലിംങ്ങള് സേവനവുമായി രംഗത്തെത്തിയെന്നും അദ്ദേഹം പറഞ്ഞു. എന്നാല്, സംഭവത്തില് ക്ഷേത്രഭരണാധികാരികള്ക്ക് ബന്ധമില്ലെന്നും ക്ഷേത്രജീവനക്കാര് ആരും സാക്കിര് ഹുസൈനെ തടഞ്ഞിട്ടില്ലെന്നും ശ്രീരംഗം ക്ഷേത്രം ജോ.കമീഷണര് മാരിമുത്തു അറിയിച്ചു.
