പന്തളം : ബംഗളുരുവില് നിന്നും ബസില് കൊണ്ടുവന്ന എംഡിഎംഎ യുമായി യുവാവിനെ ഡാന്സാഫ് സംഘവും പന്തളം പോലീസും ചേര്ന്ന് പിടികൂടി. പന്തളം തുമ്പമണ് മുട്ടം വടക്കടത്ത് മണ്ണില് വീട്ടില് ബ്രില്ലി മാത്യു (40)വാണ് അറസ്റ്റിലായത്. കുളനട ഇന്ത്യന് ഓയില് പമ്പിന്റെ മുന്നില് ബസില് വന്നിറങ്ങിയപ്പോഴാണ് പിടിയിലായത്. പ്രതിയില് നിന്നും 36.55 ഗ്രാം എംഡിഎംഎ പിടിച്ചെടുത്തു. എട്ടു ചെറിയ സിറിഞ്ചുകള് ഉള്പ്പെടെയുള്ള വസ്തുക്കളും പ്രതിയില് നിന്നും പോലീസ് കണ്ടെടുത്തു. മുന്പ് മണ്ണുകടത്തുകാരെ പിടിക്കാനുള്ള ഇന്ഫോര്മര് ചമഞ്ഞ് പോലീസിനെ കബളിപ്പിച്ചിരുന്നയാളാണ് ബ്രില്ലി.
പ്ലാസ്റ്റിക് കവറില് പൊതിഞ്ഞ് കൈവശമുണ്ടായിരുന്ന ബാഗിന്റെ അറയ്ക്കുള്ളില് സൂക്ഷിച്ച നിലയിലായിരുന്നു എംഡിഎംഎ. സ്കൂള് കോളേജ് വിദ്യാര്ത്ഥികള്ക്കും യുവാക്കള്ക്കുമായി രാസലഹരി സംസ്ഥാനത്തിനു പുറത്തു നിന്നും എത്തിക്കുന്നതായി സംശയിച്ചതിനെ തുടര്ന്ന് ഇയാള് ഡാന്സാഫിന്റെ നിരീക്ഷണത്തിലായിരുന്നു. ബംഗളുരുവില് നിന്നും എത്തിച്ച എംഡിഎംഎ ആലപ്പുഴ പത്തനംതിട്ട ജില്ലകളില് ആവശ്യക്കാര്ക്ക് വിതരണം ചെയ്യുന്നതിന് ഉദ്ദേശിച്ചു കൊണ്ടുവന്നതാണെന്ന് അന്വേഷണത്തില് വെളിവായി. ഇയാള്ക്ക് ഇത് ആരു നല്കി, കൂടുതല് പ്രതികളുണ്ടോ എന്ന് തുടങ്ങിയ കാര്യങ്ങളില് വിശദമായ അന്വേഷണം നടക്കുകയാണ്.
