പത്തനംതിട്ട : അടൂര് പ്രാഥമിക സഹകരണ കാര്ഷിക വികസന ബാങ്കില് ഡി.സി.സി നിര്ദ്ദേശം അവഗണിച്ച് രണ്ട് സി.പി.എം അംഗങ്ങളെ ഉള്പ്പെടുത്തി തെരഞ്ഞെടുപ്പ് ഒഴിവാക്കുവാന് നേതൃത്വം നല്കിയ ബാങ്ക് പ്രസിഡന്റും ഡി.സി.സി ജനറല് സെക്രട്ടറിയുമായ ഏഴംകുളം അജു, ഡി.സി.സി ഭാരവാഹികളായ ഡി.എന് ത്രിദീപ്, റെജി പൂവത്തൂര്, പന്തളം ബ്ലോക്ക് കോണ്ഗ്രസ് കമ്മിറ്റി പ്രസിഡന്റ് ബിജു ഫിലിപ്പ് എന്നിവര്ക്ക് ഡി.സി.സി പ്രസിഡന്റ് പ്രൊഫ. സതീഷ് കൊച്ചുപറമ്പില് കാരണം കാണിക്കല് നോട്ടീസ് അയച്ചു.
ഇതു സംബന്ധിച്ച് അച്ചടക്ക നടപടികള് സ്വീകരിക്കാതിരിക്കുവാന് കാരണങ്ങള് ഉണ്ടെങ്കില് 3 ദിവസങ്ങള്ക്കുള്ളില് രേഖാമൂലം മറുപടി നല്കണമെന്ന് കത്തില് ആവശ്യപ്പെട്ടിട്ടുണ്ട്. അടൂര് കാര്ഷിക വികസന ബാങ്ക് തെരഞ്ഞെടുപ്പില് തെരഞ്ഞെടുപ്പ് ഒഴിവാക്കി രണ്ട് സി.പി.എം അംഗങ്ങളെ ഉള്പ്പെടുത്തിയ സംഭവങ്ങളെക്കുറിച്ച് ഡി.സി.സി പ്രസിഡന്റ് കെ.പി.സി.സി ക്ക് റിപ്പോര്ട്ട് നല്കി.