തൃക്കാക്കര : ഉപതെരഞ്ഞെടുപ്പ് നടക്കുന്ന തൃക്കാക്കര മണ്ഡലത്തില്‍ ഇടതുപക്ഷത്തിന്റെ സ്ഥാനാര്‍ത്ഥി ജോ ജോസഫിന്റെ തിരഞ്ഞെടുപ്പ് പ്രചാരണത്തില്‍ പങ്കെടുത്ത് ഡിസിസി പ്രസിഡ‌ന്റ് എംബി മുരളീധരന്‍. വെണ്ണല മഹാദേവ ക്ഷേത്രത്തില്‍ വോട്ട് അഭ്യര്‍ത്ഥിച്ചെത്തിയ ജോ ജോസഫിനൊപ്പമാണ് മുരളീധരന്‍ എത്തിയത്. സംഭവവുമായി ബന്ധപ്പെട്ട മാദ്ധ്യമ പ്രവര്‍ത്തകരുടെ ചോദ്യങ്ങള്‍ക്ക്, ആരും ശത്രുക്കളല്ലെന്നും ജോ ജോസഫ് തന്റെ സുഹൃത്താണെന്നും മുരളീധരന്‍ വ്യക്തമാക്കി. അതേസമയം, യുഡിഎഫ് സ്ഥാനാര്‍ത്ഥിയായി ഉമാ തോമസിനെ പ്രഖ്യാപിച്ചതിന് പിന്നാലെ വിമര്‍ശനവുമായെത്തിയ എം.ബി മുരളീധരന്‍, ഇടതു സ്ഥാനാര്‍ത്ഥിയുടെ പ്രചാരണത്തിന് എത്തിയത് യുഡിഎഫ് കേന്ദ്രങ്ങളില്‍ ഞെട്ടല്‍ പടര്‍ത്തിയിട്ടുണ്ട്.
ഉമാ തോമസിനെ സ്ഥാനാര്‍ത്ഥിയായി പ്രഖ്യാപിച്ചതിന് പിന്നാലെ, രൂക്ഷവിമര്‍ശനമാണ് എം.ബി മുരളീധരന്‍ നടത്തിയത്. പി.ടി തോമസിനോട് നന്ദി കാണിക്കാന്‍ ഭാര്യയ്ക്ക് സ്ഥാനാര്‍ത്ഥിത്വം നല്‍കണോയെന്ന് അദ്ദേഹം ചോദിച്ചു. പി.ടി തോമസിന്റെ കുടുംബത്തെ സഹായിക്കുവാന്‍ മറ്റു നിരവധി മാര്‍ഗങ്ങളുണ്ടെന്നും അതിനുവേണ്ടി ഭാര്യയ്ക്ക് സ്ഥാനാര്‍ത്ഥിത്വം നല്‍കുകയല്ല വേണ്ടതെന്നും മുരളീധരന്‍ പറഞ്ഞു. പാര്‍ട്ടി പ്രവര്‍ത്തകരോട് ആലോചിക്കാതെ എടുത്ത തീരുമാനത്തിനൊപ്പം നില്‍ക്കാന്‍ കഴിയില്ലെന്നും, അതുകൊണ്ട് ഈ തിരഞ്ഞെടുപ്പില്‍ നിന്നും വിട്ടു നില്‍ക്കാന്‍ തീരുമാനിച്ചുവെന്നും അദ്ദേഹം വ്യക്തമാക്കിയിരുന്നു.
