തിരുവല്ല : സഞ്ചാരയോഗ്യമായ വഴിയില്ലാത്തതിനാല് വയോധികന്റെ മൃതദേഹം വീട്ടിലെത്തിക്കാനാവാതെ ബന്ധുക്കള് വലയുന്നു. തിരുവല്ലയിലെ നിരണത്ത് മുളമൂട്ടില് എം.കെ.എബ്രഹാമിന്റെ മൃതദേഹമാണ് അന്ത്യ വിശ്രമം കാത്ത് കഴിഞ്ഞ രണ്ട് ദിവസമായി മോര്ച്ചറിയില് കിടക്കുന്നത്. 20 വര്ഷം നീണ്ട നിയമ പോരാട്ടത്തിനൊടുവില് കോടതിയില് നിന്ന് അനുവദിച്ച വഴി അയല്വാസി സഞ്ചാര യോഗ്യമാക്കി നല്കാത്തതാണ് ദയനീയ അവസ്ഥക്ക് കാരണമെന്ന് ബന്ധുക്കള് പറഞ്ഞു.
അയല്വാസിയായ മാലിപ്പുറത്ത് കെ.വി.വര്ഗീസും എബ്രഹാമും തമ്മില് വഴിയെ ചൊല്ലി കഴിഞ്ഞ 20 വര്ഷമായി കേസ് നിലനിന്നിരുന്നു. എബ്രഹാമിന് മൂന്നേ മുക്കാല് അടി വഴി അനുവദിച്ച് ഒരു വര്ഷം മുമ്പ് കേസ് തീര്പ്പായി. എന്നാല്, വഴിയിലെ മരങ്ങള് മുറിച്ചു നീക്കാന് അയല്വാസിയായ വര്ഗീസ് തയാറായില്ല എന്നാണ് എബ്രഹാമിന്റ ബന്ധുക്കളുടെ പരാതി.
