പള്ളുരുത്തി: ഇടക്കൊച്ചിയിലെ ബേക്കറിയിൽ നിന്ന് വാങ്ങിയ ബ്രഡിനുള്ളിൽ രണ്ട് ചത്ത പല്ലികളെ കണ്ടെന്ന് പരാതി. ബ്രഡ് കഴിച്ച പള്ളുരുത്തി ഇടക്കൊച്ചി സ്വദേശിനിയായ ദിവ്യ സുഭീഷ് എന്ന യുവതി ശാരീരിക അസ്വസ്ഥത അനുഭവപ്പെട്ടതിനെ തുടർന്ന് ആശുപത്രിയിൽ ചികിത്സ തേടി. സംഭവത്തിൽ നഗരസഭ ആരോഗ്യവിഭാഗത്തിനും ഫുഡ് സേഫ്റ്റി അധികൃതർക്കും പരാതി നൽകാനുള്ള നടപടികൾ ആരംഭിക്കുകയും ചെയ്തു. തിങ്കളാഴ്ച വൈകിട്ട് ഇടക്കൊച്ചി പാമ്പായ്മൂല ജങ്ഷനിലെ ഒരു ബേക്കറിയിൽ നിന്ന് വാങ്ങിയ ബ്രഡിനുള്ളിലാണ് രണ്ട് ചത്ത പല്ലികളെ കണ്ടെത്തിയത്. ബ്രഡിൽ പല്ലികളെ കണ്ടതിനെ തുടർന്ന് കടയുടമയെ വിവരം അറിയിച്ചെങ്കിലും വിഷയം ഗൗരവമായി പരിഗണിക്കാതെ തങ്ങളെ പറഞ്ഞയച്ചുവെന്നാണ് ദിവ്യയുടെ ആരോപണം.
ഇതിനിടെ ബ്രഡ് കഴിച്ചതിന് പിന്നാലെ ഛർദിയും അവശതയും അനുഭവപ്പെട്ടതോടെ ആശുപത്രിയിൽ ചികിത്സ തേടുകയായിരുന്നു. സംഭവത്തെക്കുറിച്ച് നഗരസഭ ആരോഗ്യവിഭാഗത്തെ അറിയിച്ചതായും ഫുഡ് സേഫ്റ്റി കൺട്രോളർക്ക് ഔദ്യോഗിക പരാതി നൽകുമെന്നും ദിവ്യ സുബീഷ് അറിയിച്ചു.
