പത്തനാപുരം : കനാലില് കണ്ടെത്തിയ അഞ്ജാത മൃതദേഹം കരയ്ക്കുകയറ്റാന് 2000 രുപ കൂലി ചോദിച്ച തൊഴിലാളിയെ കാഴ്ചക്കാരനായി നിര്ത്തി സി.ഐ കനാലില് ചാടി മൃതദേഹം കരയ്ക്കുകയറ്റി. പത്തനാപുരം സി.ഐ അന്വറാണ് ഇങ്ങനെ താരമായിരിക്കുന്നത്. ബുധനാഴ്ച വൈകീട്ട് ആറുമണിയോടെ കെ ഐ പി വലതുകര കനാലിന്റെ വാഴപ്പാറ അരിപ്പയ്ക്ക് സമീപമാണ് അജ്ഞാത മൃതദേഹം കണ്ടെത്തിയത്.
മൃതദേഹം കരയ്ക്ക് എടുക്കാന് നാട്ടുകാരില് ആരും തയ്യാറായില്ല. ഇതേ തുടര്ന്ന് സ്ഥലത്തെത്തിയ തൊഴിലാളി 2000 രൂപ ചോദിച്ചു. തുടര്ന്ന് പത്തനാപുരം സി ഐ അന്വര് യൂണിഫോം അഴിച്ചുവെച്ച് കനാലില് ഇറങ്ങി മൃതദേഹം കരയ്ക്കെത്തിക്കുകയായിരുന്നു. പത്തടിയിലധികം വെള്ളമൊഴുകുന്ന കനാലില് സി.ഐ. ഇറങ്ങിയതോടെ മറ്റൊരാളും സഹായിക്കാനെത്തി.
പുറത്തെടുത്ത മൃതദേഹം പുനലൂര് താലൂക്ക് ആശുപത്രിയിലേക്ക് മാറ്റി. അടിഞ്ഞു കൂടിയ മാലിന്യത്തില് തട്ടിക്കിടന്ന മൃതദേഹം ഏതുനിമിഷവും നീര്പ്പാലത്തിലേക്ക് ഒഴുകിപ്പോകാന് സാധ്യത ഏറെയായിരുന്നു. മൃതദേഹം കരയ്ക്ക് എത്തിക്കാന് വെള്ളത്തിലിറങ്ങിയ പത്തനാപുരം സിഐ അന്വര് സമൂഹ മാധ്യമങ്ങളില് താരമായി മാറിക്കഴിഞ്ഞു.
