കൊച്ചി : മരണസര്ട്ടിഫിക്കറ്റ് നല്കുന്നതില് വീഴ്ചവരുത്തിയ ഗ്രാമപഞ്ചായത്ത് സെക്രട്ടറിക്ക് തദ്ദേശസ്ഥാപനങ്ങള്ക്ക് വേണ്ടിയുള്ള ജസ്റ്റിസ് പി.എസ്.
ഗോപിനാഥന് അയ്യായിരംരൂപ പിഴവിധിച്ചു. തിരുവനന്തപുരം കരകുളം കളത്തുകാല് കുഴിവിളാകത്ത് വീട്ടില് വി.എസ്. അമ്പിളികുമാര് നല്കിയ പരാതിയിലാണ് നടപടി. 2021 നവംബര് 17ന് മരിച്ച സുധയുടെ മരണസര്ട്ടിഫിക്കറ്റ് ലഭിക്കാന് വൈകിയതിനെത്തുടര്ന്നാണ് മകന് അതേവര്ഷം ഡിസംബര് എട്ടിന് ഓംബുഡ്സ്മാനെ സമീപിച്ചത്. മരണം വീട്ടില്വെച്ചായതിനാല് ഇതു സംബന്ധിച്ച് അന്വേഷണം നടത്തുന്നതിന് വാര്ഡിന്റെ ചുമതലയുള്ള ജീവനക്കാരനെ നിയോഗിച്ചതായി സെക്രട്ടറി നല്കിയ മറുപടിയില് പറയുന്നു.
മരണം നടന്ന വീട്ടിലെ ഗൃഹനാഥന് മരണം രജിസ്റ്റര് ചെയ്യുന്നതിന് അപേക്ഷ നല്കിയിരുന്നില്ല. സ്വത്തുക്കള് വാങ്ങിയെടുക്കാന് വേണ്ടിയാണ് പരാതിക്കാരന് മരണസര്ട്ടിഫിക്കറ്റിന് ശ്രമിക്കുന്നതെന്നും ഇത് നല്കരുതെന്നും ഇയാളുടെ സഹോദരന് ആവശ്യപ്പെട്ടിരുന്നു. സഹോദരന്മാര് തമ്മിലുള്ള തര്ക്കത്തില് ഉദ്യോഗസ്ഥര് പക്ഷംചേരുന്നത് ശരിയല്ലെന്ന് ഓംബുഡ്സ്മാന് ചൂണ്ടിക്കാട്ടി.
മരണസര്ട്ടിഫിക്കറ്റ് സമയബന്ധിതമായി നല്കുന്ന കാര്യത്തില് സെക്രട്ടറിയുടെ ഭാഗത്തുനിന്ന് ഗുരുതരമായ വീഴ്ച ഉണ്ടായിട്ടുണ്ട്. സെക്രട്ടറി ഹാജരാക്കിയ മരണസര്ട്ടിഫിക്കറ്റ് അനുസരിച്ച് ഡിസംബര് 9നാണ് മരണം രജിസ്റ്റര് ചെയ്തിരിക്കുന്നത്. ഗ്രാമപഞ്ചായത്ത് നല്കേണ്ട സേവനങ്ങള്ക്കായി പലപ്രാവശ്യം ഓഫീസ് കയറിയിറങ്ങേണ്ടി വരുന്നത് ഒരു കാരണവശാലും അംഗീകരിക്കാന് കഴിയില്ലെന്നും ഉത്തരവില് പറയുന്നു. ഒരു മാസത്തിനകം പരാതിക്കാരന് തുക നല്കണമെന്നാണ് വിധി.
