തിരുവനന്തപുരം : വധഭീഷണി ഊമക്കത്തിലൂടെ ലഭിച്ച സംഭവത്തില്‍ അന്വേഷണം സിബിഐക്കോ മറ്റേതെങ്കിലും ഏജന്‍സിക്കോ കൈമാറണമെന്ന് എം.എല്‍.എ തിരുവഞ്ചൂര്‍ രാധാകൃഷ്ണന്. ഇക്കാര്യം ആവശ്യപ്പെട്ട് മുഖ്യമന്ത്രിക്ക് കത്തയച്ചു.
പോലീസ് അന്വേഷണത്തില്‍ തനിക്ക് തൃപ്തിയില്ല. പോലീസ് അന്വേഷിച്ചാല്‍ കേസില്‍ പുരോഗതിയുണ്ടാകില്ല. ഭീഷണിക്കത്ത് സംബന്ധിച്ച് കോട്ടയം വെസ്റ്റ് പോലീസിന്റെ അന്വേഷണം എങ്ങുമെത്തിയില്ല. അതിനാല്‍ അന്വേഷണം മറ്റൊരു ഏജന്‍സിക്ക് കൈമാറണമെന്നാണ് തിരുവഞ്ചൂര്‍ രാധാകൃഷ്ണന് കത്തില്‍ ആവശ്യപ്പെട്ടിരിക്കുന്നത്.
കഴിഞ്ഞ മാസമാണ് തിരുവഞ്ചൂര്‍ രാധാകൃഷ്ണന് എം.എല്‍.എയ്ക്ക് വധഭീഷണിയുമായി ഊമക്കത്ത് ലഭിച്ചത്. എം.എല്‍.എ ഹോസ്റ്റലിലെ വിലാസത്തിലാണ് കത്ത് ലഭിച്ചത്. പത്ത് ദിവസത്തിനകം ഇന്ത്യ വിട്ടില്ലെങ്കില്‍ ഭാര്യയെയും മക്കളെയും ഉള്‍പ്പെടെ വകവരുത്തുമെന്നായിരുന്നു കത്തില്‍ സൂചിപ്പിച്ചിരുന്നത്. കത്ത് പോസ്റ്റ് ചെയ്തിരിക്കുന്നത് കോഴിക്കോട് നിന്നുമാണ്. ഇത് സംബന്ധിച്ച് തിരുവഞ്ചൂര്‍ മുഖ്യമന്ത്രിക്ക് പരാതിയും നല്‍കിയിരുന്നു.
