ദില്ലി: ദീപാവലി ആഘോഷത്തിനായി ഉപയോഗിക്കുന്ന എല്ലാത്തരം പടക്കങ്ങളുടെയും ഉല്പ്പാദനം, വില്പന, സംഭരണം, ഉപയോഗം എന്നിവയ്ക്ക് വീണ്ടും നിരോധനം ഏര്പ്പെടുത്തുന്നതായി ഡല്ഹി സര്ക്കാര് പ്രഖ്യാപിച്ചു. ശൈത്യകാലത്ത് മലിനീകരണ തോത് തടയുന്നതിനുള്ള പ്രവര്ത്തന പദ്ധതിയുടെ ഭാഗമായാണ് പ്രഖ്യാപനമെന്ന് പരിസ്ഥിതി മന്ത്രി ഗോപാല് റായ് പറഞ്ഞു.
നഗരത്തിലുടനീളം നിരോധനം നടപ്പാക്കാന് ഡല്ഹി പോലീസിന് കര്ശന നിര്ദ്ദേശം നല്കുമെന്ന് ഡല്ഹിയില് നടത്തിയ വാര്ത്താ സമ്മേളനത്തില് റായ് പറഞ്ഞു. കഴിഞ്ഞ മൂന്ന് വര്ഷമായി ഡല്ഹി സര്ക്കാര് ഈ രീതി തുടരുന്നുണ്ട്. കഴിഞ്ഞ കുറച്ച് വര്ഷങ്ങളായി ഡല്ഹിയുടെ വായുവിന്റെ ഗുണനിലവാരം ഗണ്യമായി മെച്ചപ്പെട്ടിട്ടുണ്ടെന്ന് റായ് ചൂണ്ടിക്കാട്ടി. ദീപാവലി സമയത്ത് ആരെങ്കിലും പടക്കം പൊട്ടിച്ചാല് ആറ് മാസം വരെ തടവും 200 രൂപ പിഴയും ലഭിക്കുമെന്ന് കഴിഞ്ഞ വര്ഷം സര്ക്കാര് പ്രഖ്യാപിച്ചിരുന്നു.
