തിരുവനന്തപുരം: റോഡ് കാമറ വിവാദത്തില് മുഖ്യമന്ത്രി പിണറായി വിജയന്റെ മകനെതിരെ നിയമസഭയില് ആരോപണം ഉന്നയിച്ച് പിസി വിഷ്ണുനാഥ്. ഉപകരാര് നേടിയ കമ്പനിക്ക് മുഖ്യമന്ത്രിയുടെ മകന്റെ കുടുംബവുമായി അടുത്ത ബന്ധമുണ്ടെന്നും അതിന്റെ രേഖകള് കൈവശമുണ്ടെന്നുമായിരുന്നു വിഷ്ണുനാഥ് സഭയില് പറഞ്ഞത്. സംസ്ഥാനം കണ്ട ഏറ്റവും വലിയ അഴിമതിയാണ് റോഡ് കാമറ പദ്ധതിയെന്നും വിഷ്ണുനാഥ് പറഞ്ഞു.
വീടുകള്ക്കും സ്ഥാപനങ്ങള്ക്കും മുന്നില് മോഷണം തടയാനാണ് കാമറ വയ്ക്കുന്നത്. എന്നാല് മോഷ്ടിക്കാന് വേണ്ടി കാമറ വച്ച ലോകത്തെ ആദ്യത്തെ സര്ക്കാരാണ് പിണറായി വിജയന് സര്ക്കാര്. പദ്ധതിക്കായി കെല്ട്രോണിനെ ചുമതലപ്പെടുത്തിയപ്പോള് ധനകാര്യവകുപ്പ് നോണ് പിഎംസി വര്കാണെന്ന് വ്യക്തമാക്കിയിരുന്നു. എന്നാല് ധനവകുപ്പിന്റെ ഉത്തരവിനു വിരുദ്ധമായി കെല്ട്രോണിനെ പിഎംസി വര്കാണ് ഇപ്പോള് ഏല്പ്പിച്ചിരിക്കുന്നതെന്നും അദ്ദേഹം ആരോപിച്ചു. പ്രസാദിയോ എന്ന കമ്പനിക്ക് മുഖ്യമന്ത്രിയുടെ മകന്റെ കുടുംബവുമായി വളരെ അടുത്ത ബന്ധമുണ്ടെന്നും അദ്ദേഹം ആരോപിച്ചു. എന്നാല് മുഖ്യമന്ത്രിയുടെ മകനെതിരായ പരാമര്ശം രേഖകളില്നിന്നു നീക്കണമെന്ന് ധനമന്ത്രി കെ എന് ബാലഗോപാല് ആവശ്യപ്പെട്ടു.
