ന്യൂഡല്ഹി : രാജ്യ തലസ്ഥാനത്തുണ്ടായ കലാപ കേസില് പ്രതിചേര്ക്കപ്പെട്ട വിദ്യാര്ഥി നേതാക്കളെ ഉടന് ജയില് മോചിതരാക്കാന് ഉത്തരവിട്ട് ഡല്ഹി കോടതി . വിദ്യാര്ഥി ആക്ടിവിസ്റ്റുകളായ നടാഷ നര്വാള്, ദേവാംഗന കലിത, ആസിഫ് ഇഖ്ബാല് തന്ഹ എന്നിവരെ മോചിപ്പിക്കാനാണ് കോടതി ഉത്തരവ്.
കഴിഞ്ഞ വര്ഷം പൗരത്വനിയമ ഭേദഗതിയുമായി ബന്ധപ്പെട്ടുണ്ടായ ഡല്ഹി കലാപത്തെ തുടര്ന്നാണ് മെയില് മൂന്ന് പേരും അറസ്റ്റിലാകുന്നത്. ചൊവ്വാഴ്ച ഡല്ഹി ഹൈക്കോടതി ഇവര്ക്ക് ജാമ്യം അനുവദിച്ചിരുന്നെങ്കിലും ഇവരെ ജയില് മോചിതരാക്കിയിരുന്നില്ല. നടപടിക്രമങ്ങള് പൂര്ത്തീകരിക്കുന്നതിന് മൂന്ന് ദിവസം സമയം അനുവദിക്കണമെന്നാവശ്യപ്പെട്ട് ഡല്ഹി പോലീസ് ഇന്ന് കോടതിയെ സമീപിച്ചെങ്കിലും അഡീഷണല് സെഷന്സ് ജഡ്ജി രീവന്ദര് ബേദി ഇത് തള്ളി, ഇവരെ ഉടന് വിട്ടയക്കണമെന്നാവശ്യപ്പെട്ടു.
ഹൈക്കോടതി ഇതിനകം ജാമ്യം അനുവദിച്ചതാണെന്നും തിഹാര് ജയിലിലേക്ക് വിട്ടയക്കാനുള്ള ഉത്തരവ് അയച്ചതാണെന്നും കോടതി ചൂണ്ടിക്കാട്ടി. ഇന്ന് വൈകിട്ടോടെ മൂന്ന് പേരേയും വിട്ടയക്കുമെന്നാണ് പ്രതീക്ഷിക്കുന്നത്. അഡീഷണല് സെഷന്സ് കോടതിയുടെ വിട്ടയക്കാനുള്ള ഉത്തരവിന് മൂന്ന് മണിക്കൂര് മുമ്പ് വിദ്യാര്ഥികള് ഹൈക്കോടതിയെ സമീപിച്ചിരുന്നു. അതെ സമയം ഹൈക്കോടതി ജാമ്യം അനുവദിച്ച് മണിക്കൂറുകളായിട്ടും തങ്ങളെ മനഃപൂര്വ്വം പോലീസ് തടഞ്ഞുവെച്ചിരിക്കുകയാണെന്ന് ഹര്ജിയില് ഇവര് ആരോപിക്കുന്നു . ഇന്ന് ഉച്ചയ്ക്ക് ശേഷം ഇത് പരിഗണിക്കാമെന്നാണ് ഹൈക്കോടതി അറിയിച്ചിട്ടുള്ളത്. മൂന്നുപേരെയും 50,000 രൂപ വീതമുള്ള വ്യക്തിഗത ബോണ്ടുകളിലും സമാനമായ തുകയുടെ രണ്ട് ആള് ജാമ്യത്തിലമാണ് ഹൈക്കോടതി കഴിഞ്ഞ ദിവസം ജാമ്യം നല്കിയത് .
