ന്യൂഡല്ഹി: ഡൽഹിയിൽ ഇ-ഓട്ടോറിക്ഷ പൊട്ടിത്തെറിച്ച് അപകടം. രണ്ട് പേർക്ക് ദാരുണാന്ത്യം. 38കാരനായ മുഹമ്മദ് സാബിദ്, 17കാരനായ സുഫൈദ് എന്നിവരാണ് മരിച്ചത്. ഇന്ന് പുലർച്ചെ നാല് മണിയോടെ രഘുബീർ നഗറിലാണ് അപകടമുണ്ടായത്. ഇ-ഓട്ടോറിക്ഷയുടെ ബാറ്ററി പെട്ടെന്ന് പൊട്ടിത്തെറിച്ചതിനെ തുടർന്നാണ് അപകടമുണ്ടായതെന്നാണ് പ്രാഥമിക വിവരം. വണ്ടി നിര്ത്തിയിട്ടിരുന്ന ഗോഡൗണിലേക്ക് തീപിടർന്നതായും വിവരമുണ്ട്. അഞ്ചരയോടെ തീ നിയന്ത്രണ വിധേയമാക്കി. അപകടത്തില് പരിക്കേറ്റ രണ്ട് പേരെ ഉടന് തന്നെ ആശുപത്രിയില് പ്രവേശിപ്പിച്ചെങ്കിലും ജീവന് രക്ഷിക്കാനായില്ല. ഷോർട്ട് സർക്യൂട്ടാകാം ബാറ്ററി പൊട്ടിത്തെറിക്കാൻ കാരണമെന്നാണ് പൊലീസിന്റെ പ്രാഥമിക നിഗമനം. സംഭവത്തെ തുടർന്ന് സ്ഥലത്തെത്തിയ അധികൃതർ പരിശോധന നടത്തി. അപകടത്തിന്റെ കൃത്യമായ കാരണം കണ്ടെത്തുന്നതിനായി അന്വേഷണം തുടരുകയാണ്.
