ന്യൂഡല്‍ഹി : കനത്ത മഴയെ തുടര്‍ന്ന് ഡല്‍ഹിയില്‍ ഓറഞ്ച് അലര്‍ട്ട് പ്രഖ്യാപിച്ചു. 46 വര്‍ഷത്തിനിടെ ലഭിച്ച റെക്കോര്‍ഡ് മഴയില്‍ മുങ്ങി ഡല്‍ഹി. ഇന്ദിരാഗാന്ധി വിമാനത്താവളത്തിന്റെ ടെര്‍മിനലിലും റണ്‍വേയിലും വെള്ളം ഇരച്ച്‌ കയറി. നിരവധി വിമാനങ്ങള്‍ വഴിതിരിച്ച്‌ വിടുകയും ചെയ്തു. റോഡുകളിലും വെള്ളം നിറഞ്ഞതോടെ ഗാതാഗതക്കുരുക്ക് അതിരൂക്ഷമായി. എയര്‍പോര്‍ട്ടില്‍ വെള്ളം കയറിയതിന്റെ ദൃശ്യങ്ങള്‍ പുറത്തുവന്നിട്ടുണ്ട്.
വെള്ളിയാഴ്ചയോടെ 1100 മില്ലിമീറ്റര്‍ മഴയാണ് ഈ മണ്‍സൂണ്‍ കാലത്ത് ലഭിച്ചത് . 1975 ലാണ് ഇത്രയുമധികം മഴ ഇതിന് മുമ്പ് ലഭിക്കുന്നത്. അന്ന് 1150 മില്ലിമീറ്ററാണ് ലഭിച്ചത്. പൊതുവെ മണ്‍സൂണ്‍ കാലത്ത് ശരാശരി 648.9 മില്ലിമീറ്റര്‍ മഴയാണ് രേഖപ്പെടുത്താറ്.
വിമാനസര്‍വിസുകളെ മഴ വളരെയധികം പ്രതികൂലമായി ബാധിച്ചു. സ്‌പൈസ് ജെറ്റ്, ഇന്‍ഡിഗോ, തുടങ്ങിയ വിമാനക്കമ്പിനികള്‍ തങ്ങളുടെ സര്‍വിസുകള്‍ റീഷെഡ്യൂള്‍ ചെയ്തതായി അറിയിച്ചു. യാത്രക്കാരോട് വിമാനങ്ങളുടെ തല്‍സ്ഥിതി പരിശോധിക്കാനും നിര്‍ദേശം നല്‍കി.
ജയ്പുര്‍, അഹമ്മദാബാദ് എന്നിവിടങ്ങളിലേക്കാണ് വിമാനങ്ങള്‍ വഴിതിരിച്ച്‌ വിട്ടത്. ഡല്‍ഹിയിലും സമീപ പ്രദേശങ്ങളിലും ഇടിമിന്നലോടുകൂടിയ ശക്തമായ മഴക്ക് സാധ്യതയുണ്ടെന്ന് ഇന്ത്യന്‍ കാലാവസ്ഥാ വകുപ്പ് പ്രവചിക്കുന്നു. വെള്ളിയാഴ്ച മഴ ഏറെനേരം നീണ്ടുനിന്നതോടെയാണ് കാര്യങ്ങള്‍ തകിടം മറിഞ്ഞത് . അടുത്ത 12 മണിക്കൂര്‍ കൂടി മഴ തുടരുമെന്നാണ് പ്രവചനം.
