മുംബൈ : മഹാരാഷ്ട്രയില്‍ കൊറോണ വൈറസിന്‍റെ വകഭേദമായ ഡെല്‍റ്റ പ്ലസ് ബാധിച്ച്‌ മരിച്ചവരുടെ എണ്ണം അഞ്ചായി. രത്നഗിരിയിലാണ് രണ്ടുമരണം, മുംബൈ, ബീഡ്, റായ്ഗഡ് എന്നിവിടങ്ങളില്‍ ഒരു മരണം വീതവും സ്ഥിരീകരിച്ചു. 65 വയസിന് മുകളിലുള്ള മറ്റ് അസുഖബാധിതരാണ് മരിച്ചവര്‍. മരിച്ചവരില്‍ രണ്ടുപേര്‍ വാക്സിന്‍റെ ഒരു ഡോസും രണ്ടുപേര്‍ രണ്ടു ഡോസും സ്വീകരിച്ചിരുന്നു. ഒരാള്‍ വാക്സിന്‍ സ്വീകരിച്ചിരുന്നോ എന്ന കാര്യത്തില്‍ വ്യക്തതയില്ല.
മഹാരാഷ്ട്രയില്‍ 66 പേര്‍ക്കാണ് ഇതുവരെ ഡെല്‍റ്റ പ്ലസ് വകഭേദം സ്ഥിരീകരിച്ചത്. വെള്ളിയാഴ്ച ഒരു കേസ് റിപ്പോര്‍ട്ട് ചെയ്യുകയും ഒരാള്‍ രോഗമുക്തി നേടുകയും ചെയ്തിരുന്നു. ആഗസ്റ്റ് എട്ടുവരെ 45 ഡെല്‍റ്റ പ്ലസ് കേസുകളാണ് ഇവിടെ സ്ഥിരീകരിച്ചിരുന്നത്. രോഗം സ്ഥിരീകരിച്ചവരില്‍ 32 പേര്‍ പുരുഷന്‍മാരാണ്. ബാക്കി സ്ത്രീകളും. ഇതില്‍ ഏഴുപേര്‍ 18 വയസില്‍ താഴെയുള്ളവരാണ്. മുംബൈ, പുണെ ഉള്‍പ്പെടെയുള്ള നഗരങ്ങളിലാണ് പുതിയ ഡെല്‍റ്റ പ്ലസ് കേസുകള്‍ പുതുതായി സ്ഥിരീകരിക്കുന്നത്.
