മുംബൈ: ബോളിവുഡ് സൂപ്പര് താരം സല്മാന് ഖാന്റെ സഹോദരി അര്പ്പിതയുടെ വീട്ടില് മോഷണം നടത്തിയ പ്രതി പിടിയില്. അര്പ്പിതയുടെ വീട്ടില് നിന്ന് അഞ്ച് ലക്ഷം രൂപ മൂല്യമുള്ള വജ്രാഭരണങ്ങളാണ് മോഷണം പോയത്. ഇവരുടെ വീട്ടിലെ ജോലിക്കാരനായ സന്ദീപ് ഹെഗ്ഡെയാണ് പിടിയിലായത്. ഖാറിലെ 17-ാം റോഡിലുള്ള അര്പിത ഖാന്റെ വസതിയില് നിന്ന് അഞ്ച് ലക്ഷം രൂപ വിലമതിക്കുന്ന വജ്രം പതിച്ച സ്വര്ണാഭരണങ്ങളുമായി പ്രതി സന്ദീപ് ഹെഗ്ഡെ ഒളിവില് പോയി. സംഭവം പുറത്തറിഞ്ഞതോടെ അര്പിത പോലീസിനെ സമീപിക്കുകയും പരാതി നല്കുകയും ചെയ്തു.
കഴിഞ്ഞദിവസമാണ് അര്പ്പിതയുടെ വീട്ടില് കവര്ച്ച നടന്നത്. അഞ്ച് ലക്ഷം രൂപയുടെ ആഭരണങ്ങളാണ് മോഷ്ടിക്കപ്പട്ടതെന്നും ഇവ മേക്കപ്പ് ട്രേയിലായിരുന്നു സൂക്ഷിച്ചിരുന്നതെന്നും പരാതിയില് പറയുന്നു. അര്പ്പിതയുടെ വീട്ടില് ഹൗസ്കീപ്പറായി ജോലി ചെയ്തുവന്നയാളാണ് പിടിയിലായ സന്ദീപ്. ഇന്ത്യന് ശിക്ഷാ നിയമത്തിലെ ഐപിസി 381 ഉള്പ്പെടെയുള്ള വകുപ്പുകള് പ്രകാരം ഇയാള്ക്കെതിരെ കേസെടുത്തിട്ടുണ്ടെന്നും കൂടുതല് അന്വേഷണം നടത്തിവരികയാണെന്നും പോലീസ് പറഞ്ഞു.
