പന്തളം : കുട്ടികളിലെയും മുതിർന്നവരിലെയും ഡിജിറ്റൽ ഉപകരണങ്ങളുടെ അമിതമായ ഉപയോഗം തടയുന്നതിനായി കേരള പോലീസ് സോഷ്യൽ പോലീസിങ് വിഭാഗത്തിന്റെ നേതൃത്വത്തിൽ തോട്ടക്കോണം ഗവ.ഹയർ സെക്കൻഡറി സ്കൂളിൽ വിദ്യാർത്ഥികൾക്കും രക്ഷിതാക്കൾക്കും ബോധവത്ക്കരണ ക്ലാസ്സ് നടത്തി. പത്തനംതിട്ട ജില്ലാ പോലീസ് മേധാവി ആർ.ആനന്ദിന്റെ പ്രത്യേക താൽപ്പര്യപ്രകാരമാണ് കേരള പോലീസിന്റെ ‘ഡി – ഡാഡ്’ പദ്ധതിയുടെ ഭാഗമായി ക്ലാസ്സ് നടത്തിയത്. സ്കൂൾ പി.ടി.എ. പ്രസിഡന്റ് കെ.എച്ച്.ഷിജു പരിപാടി ഉദ്ഘാടനം ചെയ്തു. എസ്.എം.സി. ചെയർമാൻ ജി.അനൂപ് കുമാർ യോഗത്തിൽ അധ്യക്ഷത വഹിച്ചു. പത്തനംതിട്ട ജില്ലാ സോഷ്യൽ പോലീസിങ്ങ് വിംഗിലെ മനശാസ്ത്ര വിദഗ്ധ എ.അപർണ്ണ, ഡി – ഡാഡ് കോർഡിനേറ്റർ പി.ആർ.അമൃത, ഡി.സി.ആർ.സി. കൗൺസിലർമാരായ അഞ്ജന ജയകുമാർ, മായ മോഹൻ, പോലീസ് കോർഡിനേറ്റർ ബി.രാജീവ് എന്നിവർ ക്ലാസുകൾക്ക് നേതൃത്വം നൽകി.
പി.ടി.എ.വൈസ് പ്രസിഡന്റ് ബിജു കുര്യൻ, എസ്.എം.സി.വൈസ് ചെയർപേഴ്സൺ സീത ലക്ഷ്മി, അധ്യാപകരായ രാജശ്രീ, ജോസ് മത്തായി, ആർ.നീതു തുടങ്ങിയവർ സംസാരിച്ചു. കുട്ടികളിലെ മൊബൈൽ, ഇന്റർനെറ്റ് അടിമത്തം നിയന്ത്രിക്കുന്നതിനും കൗൺസിലിംഗിലൂടെ ഡിജിറ്റൽ അടിമത്തത്തിൽ നിന്ന് മോചനം നൽകുന്നതിനുമാണ് ‘ഡി – ഡാഡ്’ പദ്ധതി ആരംഭിച്ചിട്ടുള്ളത്. അനിയന്ത്രിതമായ ഡിജിറ്റൽ ഉപയോഗം, ഫോൺ ലഭിക്കാതെ വരുമ്പോഴുള്ള പ്രകോപനം, അമിത ദേഷ്യം, പഠനത്തിലെ ശ്രദ്ധക്കുറവ് തുടങ്ങിയ പ്രശ്നങ്ങൾ നേരിടുന്ന കുട്ടികൾക്കാണ് ഈ പദ്ധതിയിലൂടെ പരിഹാരം കാണുന്നത്.
