കൊച്ചി : അന്വേഷണ ഉദ്യോഗസ്ഥനെ അപായപ്പെടുത്താന് ശ്രമിച്ച കേസില് നടന് ദിലീപ് സമര്പ്പിച്ച മുന്കൂര് ജാമ്യം പരിഗണിക്കുന്നത് ഹൈക്കോടതി നാളത്തേക്ക് മാറ്റി. നാളെ അവധി ദിനമാണെങ്കിലും പ്രത്യേക സിറ്റിംഗ് നടത്തിയായിരിക്കും വാദം കേള്ക്കുക. കേസില് വിശദമായ വാദം കേള്ക്കേണ്ടതുണ്ടെന്ന് ചൂണ്ടിക്കാട്ടിയ കോടതി ഇതിനായി നാളെ രാവിലെ 10.15ന് സ്പെഷ്യല് സിറ്റിംഗ് അനുവദിക്കുകയായിരുന്നു. ജസ്റ്റിസ് ടി.പി ഗോപിനാഥിന്റെ സിംഗിള് ബഞ്ചാണ് വാദം കേള്ക്കുക. അതേസമയം കേസില് പ്രതികളുടെ മുന്കൂര് ജാമ്യാപേക്ഷയെ ശക്തമായി എതിര്ത്ത് പ്രോസിക്യൂഷന് രംഗത്തുണ്ട്. ക്രിമിനല് കേസിലെ പ്രതി അന്വേഷണ ഉദ്യോഗസ്ഥരെ കൊലപ്പെടുത്താന് ഗൂഡാലോചന നടത്തുന്നത് സംസ്ഥാനത്ത് ചരിത്രത്തിലാദ്യമാണെന്നും നടിയെ ആക്രമിച്ച സംഭവത്തില് മുഖ്യ സൂത്രധാരന് ദിലീപാണെന്നും പ്രോസിക്യൂഷന് വ്യക്തമാക്കുന്നു.
