കൊച്ചി: നടന് ദിലീപിന്റെ സുഹൃത്തും ഐ.ടി സഹായിയുമായ സലീഷിന്റെ അപകടമരണം ക്രൈം ബ്രാഞ്ച് അന്വേഷിക്കും. സലീഷിന്റെ അപകടമരണത്തിലെ ദുരൂഹത അന്വേഷിക്കണമെന്നാവശ്യപ്പെട്ട് ബന്ധുക്കള് രംഗത്തെത്തിയിരുന്നു.പിന്നാലെയാണ് ക്രൈംബ്രാഞ്ച് അന്വേഷണം പ്രഖ്യാപിച്ചത്. അങ്കമാലി പോലീസിലാണ് ബന്ധുക്കള് പരാതി നല്കിയത്. സലീഷിന്റെ സഹോദരന്റെയും കുടുംബാംഗങ്ങളുടെയും മൊഴി അന്വേഷണസംഘം രേഖപ്പെടുത്തും. സലീഷ് സംവിധാനം ചെയ്ത ഷോര്ട്ട് ഫിലിമിന്റെ അണിയറപ്രവര്ത്തകരേയും കാണും. സംവിധായകന് ബാലചന്ദ്രകുമാര് ആയിരുന്നു യുവാവിന്റെ മരണത്തെ കുറിച്ച് സംശയങ്ങള് ഉന്നയിച്ചത്.
കാര് റോഡരികിലെ തൂണില് ഇടിച്ചായിരുന്നു സലീഷ് മരിച്ചത്. ദിലീപിന്റെ വിശ്വസ്തനായിരുന്ന സലീഷിന് പല നിര്ണായക വിവരങ്ങളും അറിയാമായിരുന്നു എന്ന് ബാലചന്ദ്രകുമാര് വെളിപ്പെടുത്തിയിരുന്നു. ഫോണുകളുമായി ബന്ധപ്പെട്ട് പല സുപ്രധാന വിവരങ്ങള് ശേഖരിക്കാനും ദീലീപ് സനീഷിനെ ഉപയോഗിച്ചിരുന്നു എന്നും ആരോപണങ്ങളുണ്ട്.
ദിലീപിനെ കാണാന് പോകുകയാണെന്ന് സലീഷ് പറഞ്ഞ് മൂന്ന് ദിവസം കഴിഞ്ഞായിരുന്നു സലീഷിന്റെ മരണം എന്നും ഇതില് ദൂരൂഹതയുണ്ടെന്നുമായിരുന്നു ബാലചന്ദ്രകുമാറിന്റെ ആരോപണം.
