കൊച്ചി: എം രഞ്ജിത്തിന്റെ പ്രസ്താവനയ്ക്ക് എതിരെ മദനോത്സവം സംവിധായകന് സുധീഷ് ഗോപിനാഥ്. മയക്കുമരുന്ന് വരാന് എളുപ്പമുള്ളതു കൊണ്ട് കാസര്കോടാണ് ഇപ്പോള് ഒട്ടേറെ സിനിമകള് ഷൂട്ട് ചെയ്യുന്നതെന്ന എം രഞ്ജിത്തിന്റെ പ്രസ്താവനയ്ക്ക് എതിരയാണ് സുധീഷ് ഗോപിനാഥ് രംഗത്തെത്തിയിരിക്കുന്നത്. കാസര്കോടേയ്ക്ക് സിനിമ വന്നത് മയക്കുമരുന്ന് മോഹിച്ചല്ല. ഈ ഭൂമികയുടെ സൗന്ദര്യം കൊണ്ടും സിനിമ നെഞ്ചേറ്റിയവരുടെ ധൈര്യവും ആവേശവും കൊണ്ടാണെന്നും സുധീഷ് പറഞ്ഞു. ഈ നാട്ടിലെ സാധാരണക്കാരെയും സിനിമ പ്രവര്ത്തകരെയും അപമാനിക്കുന്നതാണ് എം രഞ്ജിത്തിന്റെ പ്രസ്താവനയെന്നും സുധീഷ് പറഞ്ഞു.
കാസറഗോഡിന്റെ ഉള് നാടുകളുടെ ദൃശ്യ ഭംഗിയും സാംസ്കാരിക ശേഷിപ്പുകളുടെ കാഴ്ചകളും, ജനങ്ങളുടെ സഹകരണവും ഒക്കെ ആവാം സിനിമ പ്രവര്ത്തകരെ ഇവിടേയ്ക്ക് നോക്കാന് പ്രേരിപ്പിച്ചത്. രതീഷ് ബാലകൃഷ്ണ പൊതുവാളിന്റെ പയ്യന്നൂര് ഷൂട്ട് ചെയ്ത ആന്ഡ്രോയ്ഡ് കുഞ്ഞപ്പന് വന് വിജയമായപ്പോള് കാസര്കോട് അടക്കമുള്ള പ്രദേശത്തു നിന്നുള്ളവരുടെ പുതിയ സിനിമ പ്രവര്ത്തക സംഘം ഉണ്ടായി വന്നുവെന്നും സുധീഷ് പറയുന്നു. സിനിമ ഞങ്ങളുടെ ഒരു സാംസ്കാരിക പ്രവര്ത്തനം കൂടിയാണ്. പരാജയ ലോക്കഷന് എന്ന പഴയ പേര് ദോഷം മാറി വിജയ ലോക്കഷന് എന്ന പേരിലേക്ക് ഞങ്ങള് മാറി. തുടരെ തുടരെ സിനിമകള് ഇവിടെ ഉണ്ടാകുന്നു. കാസറഗോഡ് ഭാഗത്തെ പലരുടെയും അന്നമാണ് ഇന്ന് സിനിമ , കലാകാരന്മാരുടെ ആവേശമാണെന്നും സുധീഷ് പറഞ്ഞു.