തിരുവനന്തപുരം: നടന്‍ വിജയകുമാറിനെതിരെ ഗുരുതര ആരോപണവുമായി സംവിധായകന്‍ സിദ്ദിഖ് കൊടിയത്തൂര്‍. വിജയകുമാറിന്റെ നിസ്സഹകരണത്തെ തുടര്‍ന്ന് തന്റെ ‘ആകാശം കടന്ന്’ എന്ന സിനിമയ്ക്ക് കൂടുതല്‍ സാമ്പത്തിക ബാദ്ധ്യത നേരിടേണ്ടി വന്നുവെന്ന് സംവിധായകന്‍ പറഞ്ഞു. വിജയകുമാര്‍ മൂലം സിനിമയുടെ തിരക്കഥയില്‍ മാറ്റം വരുത്തേണ്ടി വന്നു. ചിത്രീകരണത്തിനും പ്രയാസം നേരിട്ടുവെന്ന് സിദ്ദിഖ് പറയുന്നു. മെയ് 20ന് റിലീസ് ചെയ്യേണ്ടിയിരുന്ന സിനിമ കോടതി ഇടപെടലും മറ്റുമായി നീണ്ടു പോവുകയായിരുന്നു.
15 ദിവസത്തെ ഷെഡ്യൂളില്‍ 11 ദിവസങ്ങള്‍ മാത്രമാണ് വിജയകുമാര്‍ വന്നത്. പിന്നീട് അദ്ദേഹം ഈ സിനിമയ്ക്കെതിരെ നിലകൊള്ളുകയായിരുന്നുവെന്നും സംവിധായകന്‍ വ്യക്തമാക്കി. സിനിമയില്‍ അഭിനയിക്കാന്‍ കൂടുതല്‍ പ്രതിഫലം ആവശ്യപ്പെട്ട് മഞ്ചേരി കോടതിയില്‍ നടന്‍ നല്‍കിയ കേസ് തള്ളിപ്പോയെന്നും ഈ പശ്ചാത്തലത്തിലാണ് പ്രതികരിക്കുന്നതെന്നും സംവിധായകന്‍ പറഞ്ഞു.
