പത്തനംതിട്ട : ജില്ലാ കായിക മേളയുടെ സമാപനം ശനിയാഴ്ച. ഹയർ സെക്കൻഡറി ഇംപ്രൂവ്മെൻ്റ പരീക്ഷ നടക്കുന്നതിനാലാണ് തുടർച്ചയായി മത്സരം നടത്താൻ കഴിയാതെ വന്നത്. തിങ്കളാഴ്ചയും പരീക്ഷ ഉണ്ടായിരുന്നതിനാൽ രാവിലെ മത്സരങ്ങളില് പങ്കെടുത്ത ശേഷമാണ് ഉച്ചക്ക് ശേഷം നടന്ന പരീക്ഷകളിൽ കുട്ടികൾ പങ്കെടുത്തത്. പരീക്ഷ എഴുതേണ്ടതിനാൽ ദൂരെ സ്ഥലങ്ങളിൽ കായിക താരങ്ങൾ സ്വന്തമായി വാഹനങ്ങൾ വിളിച്ചാണ് എത്തിയത്. ക്രോസ് കൺട്രി, ട്രിപ്പിൾ ജംമ്പ്, ജാവലിൻ ത്രോ , 200 മീ, 400 മീറ്റർ, 1500 മീറ്റർ, ഹാമർ ത്രോ, റിലേ മൽസരങ്ങൾ തുടങ്ങി 36 ഓളം ഇനങ്ങൾ അന്ന് നടക്കും. വൈകിട്ട് 3ന് നടക്കുന്ന സമാപന സമ്മേളനത്തിൽ കെ.യു.ജനീഷ് കുമാർ എം.എൽ.എ അദ്ധ്യക്ഷത വഹിക്കും.
മാത്യു ടി.തോമസ് എം.എൽ.എ സമാപന സമ്മേളനം ഉദ്ഘാടനം ചെയ്യും. ജില്ലാ പഞ്ചായത്ത് പ്രസിഡന്റ് ഓമല്ലൂർ ശങ്കരൻ സമ്മാനദാനം നിർവഹിക്കും. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ആർ. അജയകുമാർ വിജയികൾക്ക് സർട്ടിഫിക്കറ്റ് വിതരണം ചെയ്യും. ജില്ലാ സ്കൂൾ കായികമേളയും സംസ്ഥാന സ്കൂൾ കായിക മേളയും അടുത്തടുത്ത് വന്നതോടെ കായിക താരങ്ങൾ വലഞ്ഞിരിക്കയാണ്. ജില്ലാ കായികമേള കഴിഞ്ഞു ഒരു ദിവസത്തെ വിശ്രമമാണ് സംസ്ഥാന കായികമേളയ്ക്കായി താരങ്ങൾക്ക് ലഭിക്കുന്നത്.
