റാന്നി : ഇടപ്പാവൂർ ഭഗവതിക്ഷേത്രത്തിലെ ദേവപ്രശ്ന പരിഹാരക്രിയകൾ പൂർത്തീകരിച്ചു. തന്ത്രി പ്രതിനിധി പള്ളിപ്പാട്ട് രാജേഷ് നമ്പൂതിരിയുടെ കാർമികത്വത്തിൽ ഞായറാഴ്ച നടന്ന സുബ്രഹ്മണ്യപൂജയോടെയാണ് സമാപനമായത്. 15-ന് വെള്ളി വേൽ പഴനി ക്ഷേത്രത്തിൽ സമർപ്പിക്കുന്നതോടെ രണ്ടുവർഷം മുമ്പ് നടത്തിയ ദേവപ്രശ്നത്തിൽ നിർദേശിച്ച എല്ലാ പരിഹാരക്രിയകളും പൂർത്തിയാകുമെന്ന് ക്ഷേത്രം ഭരണസമിതി ഭാരവാഹികൾ പറഞ്ഞു. ഞായറാഴ്ച ഭദ്രാക്ഷേത്രത്തിലെ പ്രതിഷ്ഠാദിന പൂജകളും നടന്നു.
ക്ഷേത്രഭരണ സമിതിയുടെ നേതൃത്വത്തിൽ പഠനത്തിൽ മികവ് തെളിയിച്ചള്ളവർക്കുള്ള എൻഡോവ്മെന്റ് വിതരണവും വിദ്യാഭ്യാസ ചികിത്സാ ധനസഹായ വിതരണവും നടന്നു. മാധ്യമ പ്രവർത്തകൻ പി.ജി. സുരേഷ്കുമാർ എൻഡോവ്മെന്റുകളും ധന സഹായവും വിതരണം ചെയ്തു. ഭരണസമിതി പ്രസിഡന്റ് എം.ജോഷ് കുമാർ അധ്യക്ഷത വഹിച്ചു. ഭരണസമിതി വിദ്യാർഥികൾക്കായി ഏർപ്പെടുത്തിയിട്ടുള്ള ശ്രീഭദ്ര എവറോളിങ് ട്രോഫി പ്ലസ്ടുപരീക്ഷയിൽ മികച്ച വിജയം നേടിയ മാളവിക എം. നായർക്കും എസ്എസ്എൽസി പരീക്ഷയിൽ മികച്ച വിജയം നേടിയ അഭിനയ രാജേഷിന് മെമന്റോയും നൽകി. സെക്രട്ടറി വി.കെ. ഗോപകുമാർ, ട്രഷറർ എം.ടി. സുരേഷ്, വൈസ് പ്രസിഡന്റ് വിദ്യാധരൻ അമ്പലാത്ത്, ജോയിന്റ് സെക്രട്ടറി ജാനേഷ് കുമാർ തുടങ്ങിയവർ പ്രസംഗിച്ചു.
