ഡല്ഹി : ശരദ് പവാറിന്റെ പേരും ചിത്രവും ക്ലോക്ക് ചിഹ്നവും തിരഞ്ഞെടുപ്പ് പ്രചാരണങ്ങളില് ഉപയോഗിക്കരുതെന്ന് അജിത് പവാര് വിഭാഗത്തോട് സുപ്രീംകോടതി. അജിത് പവാര് പക്ഷത്തിന് എന്.സി.പി.യുടെ ഔദ്യോഗിക ‘ക്ലോക്ക്’ ചിഹ്നം നല്കിയതിനെതിരേ ശരദ് പവാര് സമര്പ്പിച്ച ഹര്ജിയിലാണ് ജസ്റ്റിസുമാരായ സൂര്യകാന്ത്, കെ.വി. വിശ്വനാഥന് എന്നിവരടങ്ങിയ ബെഞ്ചിന്റെ വാക്കാലുള്ള നിരീക്ഷണം. നേരത്തെ അജിത് പവാര് വിഭാഗത്തെ ഔദ്യോഗികവിഭാഗമായി അംഗീകരിച്ച് തിരഞ്ഞെടുപ്പ് കമ്മിഷന് ക്ലോക്ക് ചിഹ്നം അനുവദിച്ചിരുന്നു.
ശരദ് പവാറിന്റെ പേര് നേരിട്ടോ അല്ലാതെയോ ഉപയോഗിക്കില്ലെന്ന് ഉറപ്പുനല്കണമെന്ന് അജിത് പവാര് പക്ഷത്തോട് കോടതി ആവശ്യപ്പെട്ടു. ആശയക്കുഴപ്പം ഉണ്ടാകാതിരിക്കാന് അജിത് പവാര് വിഭാഗം മറ്റൊരു ചിഹ്നം തിരഞ്ഞെടുപ്പിന് ഉപയോഗിക്കണമെന്നും ബെഞ്ച് വാക്കാല് നിര്ദേശിക്കുകയും ചെയ്തു.
