പത്തനംതിട്ട: ജില്ലയില് കോവിഡ് സ്ഥിരീകരണത്തില് നിര്ണായക പങ്കു വഹിച്ച റാന്നി താലൂക്ക് ആശുപത്രിയിലെ ശ്വാസകോശ രോഗ വിദഗ്ധന് ഡോ. എസ്.ആനന്ദിന്റെ പരിശോധനാ ഫലം നെഗറ്റീവ്. കോവിഡ് രോഗബാധിതരെ പരിശോധിച്ചതിനാല് മുന്കരുതലായി വീട്ടില് ഐസലേഷനില് കഴിഞ്ഞ ഡോക്ടറുടെ പരിശോധനാഫലം ഇന്നലെയാണു വന്നത്. ജില്ലയില് ആദ്യമായി കോവിഡ് 19 ബാധിച്ച റാന്നി ഐത്തല സ്വദേശികള് പനിക്ക് ചികിത്സ തേടി താലൂക്ക് ആശുപത്രിയിലെ ഒപി വിഭാഗത്തില് ആനന്ദിനെയാണു കണ്ടത്. രോഗലക്ഷണങ്ങള് കണ്ട് കോവിഡാകാമെന്ന സംശയം ഉന്നയിച്ചത് ആനന്ദാണ്.
സഹോദരന് ഇറ്റലിയില് നിന്ന് വന്നിട്ടുണ്ടെന്നും അവര് സ്വകാര്യ ആശുപത്രിയില് ചികിത്സ തേടിയതായും അവര് പറഞ്ഞപ്പോള് ആനന്ദ് ആശുപത്രി സൂപ്രണ്ട് ഡോ. എം.എം.ശംഭുവിനെ വിവരമറിയിച്ചു. മുഖാവരണവും കയ്യുറയും ധരിച്ചാണ് പിന്നീട് പരിശോധന പൂര്ത്തിയാക്കിയത്. ഡോ. ശംഭുവാണ് മക്കപ്പുഴ പ്രാഥമികാരോഗ്യ കേന്ദ്രത്തിലെ ജീവനക്കാരെയും ഡിഎംഒയെയും വിവരം അറിയിച്ചത്. അവരാണ് ഐത്തലയിലെ വീട്ടില് എത്തി ഇറ്റലിയില്നിന്നു വന്നവര് ഉള്പ്പെടെ 5 പേരെയും പത്തനംതിട്ട ജനറല് ആശുപത്രിയിലെ ഐസലേഷന് വാര്ഡിലേക്ക് മാറ്റിയത്. ഡോ. ആനന്ദ് നിരീക്ഷണം നടത്തിയില്ലായിരുന്നെങ്കില് രോഗം നിര്ണയം വൈകുകയും വ്യാപനം വര്ധിക്കുകയും ചെയ്യുമായിരുന്നു.
ഏഴിനു രാത്രി ഐത്തലയിലെ കുടുംബത്തിന് കോവിഡ് 19 സ്ഥിരീകരിച്ചതോടെ ഡോ. ആനന്ദും നിരീക്ഷണത്തിലായി. ഡോക്ടറുടെ സ്രവം പരിശോധിച്ച് വൈറസ് ബാധയില്ലെന്ന് ഉറപ്പിക്കുകയും ചെയ്തു. തിരുവല്ല താലൂക്ക് ആശുപത്രിക്കു സമീപം അമ്പലത്തിങ്കല് കുടുംബത്തിലെ അംഗമാണ് ഡോ. ആനന്ദ്. കഴിഞ്ഞ മൂന്നുവര്ഷമായി റാന്നി താലൂക്ക് ആശുപത്രിയിലാണ് ജോലി നോക്കുന്നത്. മന്ത്രി കെ.കെ.ശൈലജയും രാജു എബ്രഹാം എംഎല്എയും ഡോ. ആനന്ദിനെ ഫോണില് വിളിച്ച് അഭിനന്ദിച്ചു. ഇതിനു പുറമേ നാടിന്റെ നാനാഭാഗങ്ങളില് നിന്നും അഭിനന്ദന പ്രവാഹമാണ്.