ഡല്‍ഹി : ഡല്‍ഹി സഫ്ദര്‍ജംഗ് ആശുപത്രിയിലെ രണ്ട് റെസിഡന്റ് ഡോക്ടര്‍മാര്‍ക്ക് കൊറോണ വൈറസ് സ്ഥിരീകരിച്ചു. ഇവരില്‍ ഒരാള്‍ കൊവിഡ് -19 യൂണിറ്റില്‍ പോസ്റ്റ് ചെയ്ത ഒരു പുരുഷ ഡോക്ടറാണ്, മറ്റൊരാള്‍ ബയോകെമിസ്ട്രി വിഭാഗത്തിലെ മൂന്നാം വര്‍ഷ വനിതാ പിജി വിദ്യാര്‍ത്ഥിനിയാണ്. ഇവര്‍ക്ക് വിദേശ യാത്രാ ചരിതമുണ്ട്. ഇരുവരും കൊറോണ വൈറസിന്റെ ലക്ഷണങ്ങള്‍ കാണിച്ചിരുന്നു. അവരുടെ പരിശോധനാ ഫലങ്ങള്‍ രണ്ട് ദിവസം മുന്‍പാണ് പോസിറ്റീവായത്. സഫ്ദര്‍ജംഗ് ആശുപത്രിയിലെ ഐസോലേഷന്‍ വാര്‍ഡില്‍ ഇരുവരും ചികിത്സയിലാണ്.
അവരുമായി സമ്പര്‍ക്കം പുലര്‍ത്തിയിരുന്ന എല്ലാ ഡോക്ടര്‍മാരെയും ജീവനക്കാരെയും പരിശോധനയ്ക്ക് വിധേയമാക്കി. ഇതുവരെ, ഇവരിലൊന്നും കൊറോണ കൊറോണ വൈറസ് അണുബാധയ്ക്ക് പോസിറ്റീവ് ഫലം ലഭിച്ചിട്ടില്ല. എല്ലാവരോടും അവരുടെ ആരോഗ്യം നിരീക്ഷിക്കാന്‍ ആവശ്യപ്പെട്ടിട്ടുണ്ടെന്ന് അധികൃതര്‍ പറഞ്ഞു. കേന്ദ്ര ആരോഗ്യ മന്ത്രാലയത്തിന്റെ കണക്കനുസരിച്ച്‌ രാജ്യത്ത് ഇതുവരെ 1,637 കൊവിഡ് -19 കേസുകള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. ഇതില്‍ 38 പേര്‍ മരിച്ചു.
