ഡല്ഹി : നീറ്റ് പി.ജി കൗണ്സലിംഗ് വൈകുന്നതിനെതിരെ ഇന്നലെ ഡല്ഹിയില് സമരം ചെയ്ത റസിഡന്റ് ഡോക്ടര്മാര്ക്കു നേരെയുണ്ടായ പോലീസ് നടപടിയില് പ്രതിഷേധം. നാളെ രാവിലെ 8 മുതല് രാജ്യവ്യാപകമായി പണിമുടക്കാനാണ് ദ ഫെഡറേഷന് ഓഫ് ഓള് ഇന്ത്യ മെഡിക്കല് അസോസിയേഷന്റെ തീരുമാനം. എല്ലാവിധ സേവനങ്ങളില് നിന്നും വിട്ടുനിന്നുകൊണ്ടായിരിക്കും പ്രതിഷേധം.
ഡോക്ടര്മാരെ പോലീസ് തെരുവില് നേരിട്ടതോടെ ഇരുപക്ഷത്തും നിരവധി പേര്ക്ക് പരിക്കേറ്റിരുന്നു. അതിനിടെ ഡല്ഹിയില് റസിഡന്റ് ഡോക്ടര്മാര് സുപ്രീം കോടതിയിലേക്ക് മാര്ച്ച് നടത്തുകയാണ്. സഫ്ദര്ജംഗ് ആശുപത്രിയില് നിന്നാണ് മാര്ച്ച് ആരംഭിച്ചത്. ഇന്നലെ മര്ദ്ദിച്ച പോലീസുകാരെ അറസ്റ്റു ചെയ്യണമെന്നും അവര് ആവശ്യപ്പെടുന്നു. ഡല്ഹിയിലെ ഡോക്ടര്മാര്ക്ക് പിന്തുണയുമായി മറ്റ് സംസ്ഥാനങ്ങളില് നിന്നുള്ള സര്ക്കാര് ഡോക്ടര്മാര് വരുന്നുണ്ട്. ഡോക്ടര്മാരെ എയിംസ് കാമ്പസ് വിട്ട് പോകാന് അനുവദിക്കില്ലെന്ന് പോലീസ് അറിയിച്ചു. റോഡ് അടയ്ക്കുമെന്നും സഫ്ദര്ജംഗ് പോലീസ് അറിയിച്ചു.
