പത്തനംതിട്ട : ജില്ലയിലെ റാന്നി, ആറന്മുള, തിരുവല്ല, കോന്നി നിയോജക മണ്ഡലങ്ങളില് മഴക്കെടുതി രൂക്ഷമായപ്പോള് മനുഷ്യരോടൊപ്പം വളര്ത്ത് മൃഗങ്ങളും പ്രതിസന്ധിയിലായി. ജില്ലയുടെ വിവിധ മേഖകളിലെ പഞ്ചായത്തുകളില് പശുവും പോത്തും ആടും കോഴികളും നായയും പൂച്ചയുമുള്പ്പടെ നിരവധി വളര്ത്ത് മൃഗങ്ങളാണ് തീറ്റയും വെള്ളവും കിട്ടാതെ വലഞ്ഞത്. മനുഷ്യര് ദുരിതാശ്വാസ ക്യാമ്പുകളില് അഭയം തേടിയപ്പോള് ചില മൃഗങ്ങളെ കൂടെ കൂട്ടുകയും മറ്റ് ചിലതിനെ ഉപേക്ഷിക്കേണ്ടതായും വന്നു. ജില്ലയിലെ നദികളില് മഴവെള്ളം കുത്തിയൊഴുകിയപ്പോള് ഒഴുകി പോയ പോത്തും പശുവും ആടും കോഴികളും അനവധിയാണ്.
ഒഴുക്കിനിടെ കരയ്ക്കടിഞ്ഞവയില് ചിലതിനെ സന്നദ്ധ സംഘടനകളും നാട്ടുകാരും ചേര്ന്ന് രക്ഷപെടുത്തുകയും സമൂഹ മാധ്യമങ്ങള് വഴി അറിയിപ്പ് കൊടുത്ത് ഉടമകള്ക്ക് കൈമാറിയതും ആശ്വാസകരമാണ്. ആറന്മുള, റാന്നി, തിരുവല്ല, ചെങ്ങന്നൂര്, മുളക്കുഴ ഭാഗങ്ങളില് കോഴി ഫാമുകളില് വെള്ളം കയറിയതിനെ തുടര്ന്ന് ആയിരക്കണക്കിന് കോഴികളാണ് ചത്തൊടുങ്ങിയത്. ഇതിന്റെ കണക്കുകള് ശേഖരിച്ച് വരുന്നതേയുള്ളൂ. കന്നുകാലികള് നഷ്ടപ്പെട്ടതോടെ വലിയ പ്രതിസന്ധിയിലാണ് ജില്ലയിലെ ക്ഷീര കര്ഷകര്. കുടുംബത്തിന്റെ വരുമാന മാര്ഗ്ഗമായിരുന്ന വളര്ത്ത് മൃഗങ്ങളാണ് പലര്ക്കും നഷ്ടമായത്. ഇവര്ക്കുള്ള നഷ്ട പരിഹാരവും അടിയന്തിരമായി സംസ്ഥാന സര്ക്കാര് നല്കണമെന്നും ആവശ്യമുയരുന്നു.
