റാന്നി: സ്ത്രീ ശാക്തീകരണത്തിനായി റാന്നിയിൽ നടപ്പാക്കുന്ന ഷീ റൈസ് പദ്ധതിയുടെ ഭാഗമായി ഡൊമസ്റ്റിക് ഹെൽത്ത് കെയർട്രെയിനിങ് കോഴ്സ് ഈ മാസം 6 ന് ആരംഭിക്കുമെന്ന് അഡ്വ. പ്രമോദ് നാരായൺ എംഎൽഎ അറിയിച്ചു. വനിതകൾക്ക് തൊഴിൽ ലഭ്യത ഉറപ്പാക്കുന്നതിനായി പാലിയേറ്റീവ് പരിചരണത്തിൽ പരിശീലനം നൽകുന്ന പദ്ധതിക്കാണ് തുടക്കമിടുക. കുടുംബശ്രീ മിഷന്റെയും വിജ്ഞാന കേരളത്തിന്റെയും ആരോഗ്യവകുപ്പിന്റെയും സഹകരണത്തോടെയാണ് ഈ ബൃഹദ് പദ്ധതി നടപ്പാക്കുക. ഇതുവഴി കിടപ്പുരോഗികൾക്ക് മികച്ച പരിചരണം ഉറപ്പാക്കാനും ആകും.
ഓരോ പഞ്ചായത്തിലെയും സിഡിഎസ് മുഖേന രോഗി പരിചരണത്തിന് താല്പര്യമുള്ളവരെ കണ്ടെത്തി അതാത് പഞ്ചായത്തിലെ പ്രാഥമികാരോഗ്യ കേന്ദ്രം വഴിയാണ് പരിശീലനം നൽകുക. വയോജനങ്ങൾ, രോഗികൾ, ഭിന്നശേഷിക്കാർ. പ്രസവ ശുശ്രൂഷ ആവശ്യമുള്ളവർ, ശിശുപരിചരണം എന്നിവയിലാണ് പരിശീലനം നൽകുക. പരിശീലനം ലഭിക്കുക വഴി വനിതകൾക്ക് നാട്ടിൽ തന്നെ തൊഴിൽ ഉറപ്പാക്കാൻ കഴിയും. ഇതോടൊപ്പം നിയോജകമണ്ഡലത്തിലെ വിവിധ പഞ്ചായത്തുകളിലായി 500 പേർക്കുള്ള തയ്യൽ പരിശീലനവും പൂർത്തികരിച്ചിട്ടുണ്ട്. രണ്ടാം ഘട്ട പരിശീലനം ഉടൻ ആരംഭിക്കും.
