പൂനെ: റിയൽ എസ്റ്റേറ്റ് ഏജന്റായിരുന്ന കേതൻ അഗർവാളിനെ കൊലപ്പെടുത്തിയ കേസിൽ നീതി തേടി അമ്മ രാഖി അഗർവാൾ പ്രധാനമന്ത്രി നരേന്ദ്ര മോദിക്ക് അയച്ച വൈകാരികമായ കത്ത് വാർത്തയാകുന്നു. സഹതാപമോ പ്രത്യേക ആനുകൂല്യമോ അല്ല, മറിച്ച് മകന്റെ മരണത്തിന് ഉത്തരവാദികളായവർക്ക് അർഹമായ പരമാവധി ശിക്ഷ ഉറപ്പാക്കുന്ന നീതി മാത്രമാണ് താൻ ആഗ്രഹിക്കുന്നതെന്ന് രാഖി കത്തിൽ വ്യക്തമാക്കുന്നു.
“എല്ലാ അമ്മമാരെയും പോലെ എന്റെ മകന്റെ വിവാഹം സ്വപ്നം കണ്ടിരുന്നവളാണ് ഞാൻ. എന്നാൽ അതിനുപകരം, എന്റെ മകന്റെ അന്ത്യകർമങ്ങൾ ചെയ്യേണ്ടി വന്ന നിർഭാഗ്യവതിയായ ഒരമ്മയാണ് ഞാൻ.
കേതൻ ക്രൂരമായി കൊല്ലപ്പെട്ടതോടെ എന്റെ ലോകം തന്നെ അവസാനിച്ചു. വീടിന്റെ ഓരോ കോണിലും അവന്റെ ചിരി കേൾക്കാത്ത നിശബ്ദത എന്നെ വേട്ടയാടുന്നു,” രാഖി കത്തിൽ എഴുതി. കേതന്റെ മരണത്തിന് 20 ദിവസങ്ങൾക്ക് ശേഷം, കൊച്ചുമകന്റെ വിയോഗം താങ്ങാനാവാതെ അദ്ദേഹത്തിന്റെ മുത്തച്ഛനും വിടപറഞ്ഞ കാര്യം അവർ കത്തിൽ വേദനയോടെ ഓർമ്മിപ്പിക്കുന്നു. “കേതനെ വെറുമൊരു കേസ് ഫയലായി മാറാൻ അനുവദിക്കരുത്. അവൻ എന്റെ മാത്രം മകനല്ലായിരുന്നു, ഒരു സഹോദരനും ചെറുമകനുമായിരുന്നു. നീതി ലഭിച്ചുവെന്ന് എനിക്ക് ഒരു ദിവസം പറയാൻ കഴിയണം,” എന്ന് പ്രധാനമന്ത്രിയോട് നേരിട്ട് അപേക്ഷിച്ചുകൊണ്ട് അവർ കൂട്ടിച്ചേർത്തു.
ജൂൺ 18-ന് പൂനെയിലെ ലോഹഗഡ് കോട്ടയ്ക്ക് സമീപമുള്ള താഴ്വരയിൽ കേതൻ അഗർവാളിനെ മരിച്ച നിലയിൽ കണ്ടെത്തിയിരുന്നു. ആദ്യം അപകടമരണമെന്ന് കരുതിയ സംഭവം, പോലീസ് നടത്തിയ വിപുലമായ അന്വേഷണത്തിൽ ആസൂത്രിതമായ കൊലപാതകമാണെന്ന് തെളിയുകയായിരുന്നു. കേതനെ പാറക്കെട്ടിൽ നിന്ന് തള്ളിയിട്ട് കൊലപ്പെടുത്തിയ കേസിൽ അദ്ദേഹത്തിന്റെ പ്രതിശ്രുത വധു സിയ ഗോയൽ, കാമുകൻ ചേതൻ ചൗധരി എന്നിവരെ പോലീസ് അറസ്റ്റ് ചെയ്തു. സിസിടിവി ദൃശ്യങ്ങൾ, ഡിജിറ്റൽ രേഖകൾ, സാക്ഷി മൊഴികൾ എന്നിവയുൾപ്പെടെ ശക്തമായ തെളിവുകൾ പ്രതികൾക്കെതിരെ പോലീസ് ശേഖരിച്ചിട്ടുണ്ട്. നിലവിൽ ഇരുവരും ജുഡീഷ്യൽ കസ്റ്റഡിയിലാണ്.
