പത്തനംതിട്ട: പന്തളത്ത് പശുവിന് പേവിഷബാധയെന്ന് സംശയം. തെക്കേമണ്ണില് സന്തോഷ് കുമാറിന്റെ പശുവാണ് രോഗ ലക്ഷണങ്ങള് കാണിക്കുന്നത്. അതേസമയം പശുവിന് പേവിഷബാധ സ്ഥിരീകരിച്ചിട്ടില്ലെന്ന് മൃഗസംരക്ഷണ വകുപ്പ് അധികൃതര് അറിയിച്ചു. വെള്ളിയാഴ്ച മുതലാണ് ലക്ഷണങ്ങള് കണ്ടുതുടങ്ങിയത്. പിന്നീട് കഴിഞ്ഞ മൂന്നുദിവസമായി പശു തീറ്റ എടുക്കുന്നില്ല. രോഗ ലക്ഷണങ്ങള് കണ്ടു തുടങ്ങിയപ്പോള് തന്നെ മൃഗാശുപത്രിയില് വിവരം അറിയിച്ചു.
രണ്ടേകാല് വയസ്സുള്ള പശു 6 മാസം ഗര്ഭിണിയാണ്. പശു പേവിഷബാധയുടെ രോഗലക്ഷണങ്ങള് കാണിച്ച സാഹചര്യത്തില് സ്ഥലത്തെ മറ്റു മൃഗങ്ങളെയും മൃഗസംരക്ഷണ വകുപ്പ് നിരീക്ഷിക്കുന്നുണ്ട്. സമീപ പ്രദേശങ്ങളില് പേവിഷ ബാധ ലക്ഷണങ്ങള് ഉള്ള നായ്ക്കളെ കണ്ടതായും അറിവില്ലെന്ന് അധികൃതര് അറിയിച്ചു.
